Lafaek News—Turizmu Komunitaria Beto Tasi Kreativu (BETAKRE) lokaliza iha aldeia Beto-Tasi, suku Madohi, postu-administrativu Don-Aleixo, Munisípiu Dili, iha ne’ebé foin eziste iha fulan jullu nia laran konsege hetan rendimentu husi vizitante sira ho montante rihun rua ($2.000).
Tuir Koordenadór grupu BETAKRE, Santiago Martins, hatete inisiativa kria fatin turizmu komunitaria kontribui husi joven no kumunidade sira ne’ebé ho voluntariamente so’e osan hamutuk kada ema ida dollar $2 to’o dollar atus ida hahú dezenvolve fatin turizmu, foin eziste fulan 2 nia laran konsege hetan rendimentu di’ak.
“Ami hahú ho ami nia osan rasik, no hetan kontribuisaun mós husi joventude aldeia beto tasi no kada ema ida hatama dollar rua hodi instala fatin ne’e, to’o ohin loron ami hetan fali rendimentu ne’ebé tama fulan ida nian hamutuk rihun $2.000,” hatete kordenador BETAKRE Santiago Martins ba jornalista lafaek news iha turizmu komunitaria Beto kuarta (14/07/2021).
Nia hatutan, vizitante ne’ebé mai vizita fatin turizmu komunitaria ne’e husi turista lokal no mós insternasional ne’e kada ema ida dollar $ 1, parajen karreta sentavos $0.50, motor sentavus $0.25, husi osan hirak ne’e máka hodi dezenvolve fila fali fatin turizmu komunitaria BETAKRE.
“Vijitante mai barak liu ne’e iha loron sabadu ho domingo bele to’o atus lima lahanesan ho loron bai-bain no visitante ida selu dollar $1, osan hirak nemáka hadia fali turizmu,” nia informa.
Nune’e mós nia dehan, ezistensia fatin turizmu komunitaria sai alternativu ida ne’ebé redus konflitu iha sosiedade nia leet.
“Turizmu ne’e konsidera hanesan alternativu ida ne’ebé bele reduz problema entre joven sira, atu nune’e kria paz no estabilide iha sosiedade nia leet,” tuir nia.
Iha fatin hanesan vizitante Craerong Pinto, senti orgullu ho joventude aldeia beto tasi nia servisu hamutuk hodi kria no dezenvolve rasik turizmu komunitaria, no Atrai tebes vizitante sira.
“Ha’u senti orgullu ho joventude sira ne’e nia kreativu tanba bele halo fatin ne’e sai fatin turizmu komunitariu ba ema hotu, tanba fatin baibain bele sai ba fatin turizmu ne’e hanesan motivasaun ida ba maluk joven sira seluk ne’ebé máka hakarak halo hanesan ne’e,” nia hakotu.
Tuir observsaun lafaek news iha terenu nota, rejistrasaun ba vizitante kontinua la’o ne’ebé vizita turizmu komunitaria, iha mós uma baraka, eletrisidade, no prepara mós fatin hodi hasai foto, tara sunbriña, no tur fatin inklui mós negosiante sira faan hahan, bee iha fatin refere.
Jornalista : Ekipa Lafaek News
Editór : Agapito de Deus
