Loron 23/05/2022, housi: Domingos Maia.
(Cf. At 1,8 vs Rm 12, 2). Kbi’it rua (di’ak no aat) hasoru- malu nafatin.
Koko tanesan (compara) tok ambiente oin rua diferente ho kbi’it oin rua mós diferente : Ida dal-uluk ho karáter divinu tún housi laleha mai; ida fali ho nia karáter naturál mundanu diabóliku; jogu entre kbi’it rua: pozitivu no negativu. Ikus mai, ida de’it mak sei manan.
1) Ambiente ida maka haree
bainhira iha Tempo Pentekosta, Espírito Santo Paráclito tún ba Maria Virgem no Apóstulo sira, iha Senáculo. Eskolante sira na’in 12 (sanulo resin rua) ho Inan Maria Virgem. Iha tempu nebá mundu sei matan-tomak ba moris kristaun nian. Aliás foin mak hahú no nakunu tebes ho dezafiu sira.
Maibé bele haree tuir, oinsá kbi’it Espírito Santo nian atua forte lós iha sira hodi hatudu sinál sira Aman Maromak nian tuir Jesus rasik hameno nanis tiha ona ba sira molok hiit-An sa’e ba lalehan. Afinál iha tempu nebá dezafiu no risku -boot ameasa duni mate ba Apóstulo sira; sira-nia númeru sei limitadu lós ho kuantidade sarani nian, sei sura ho liman- fukun sanulu. Maibé tanbasá mak sira brani tebes fó-an ba mate?
2) Ambiente seluk ida fali, mak iha ita-nia tempu, oras ne’e:
Tintinan, Kreda partikular fó Konfirmasaun ba sarani rihun ba rihun, iha meiu ambiente mundu, nebé koñese ona moris kristaun nian nakloke- luan tiha ona.
Maibé ladun hatudu asaun Espírito Santo nian nebé forte iha espíritu militante housi sarani sira atu brani hasouru dezafiu-boot sira mundu nian, ohin loron. Afinál sempre hatudu atitude orgullu kona-bá nia kuatidade maioria 90/100 (noventa por cento) ba leten.
Fihir tiha kbi’it opozante rua ne’e: Kbi’it Espírito Santo iha sorin ida; no iha sorin-seluk, kbi’it-aat housi espíritu mundu nian. Maka, se parte ida la funsiona ona katak lakon tiha nia kbi’it no dominadu ona housi parte ida seluk.
Aha, pergunta ba sarani sira iha Kreda loká TL maka tuir mai:
a) Oinsá bele sukat ou avalia impatu kbi’it Espírito Santo nian liuhousi Sakramentu Konfirmasaun atu hasouru babeur sira espíritu-aat mundu nian, ohin loron? Ezemplu balun de’it:
— Oinsá atu haklean sarani sira nia koñesimentu jerál kona-bá abut doutrina sarani nian nebé la klean, maske nakloke tiha ona ba kristianismu housi tinan 500-600 (atus lima too atus neen) liubá? Ne’e mak exije duni kestaun kualidade fiar.
— Oinsá atu hari’i atitude fiar ne’e nu’udar virtude fortaleza ida ba hasouru korente infiltrasaun sekte oin-oin nebé sasurut tama tiha ona iha TL?
— Prátika teoria ideolójiku filozófiku sira nebé ho razaun liberdade no direitu umanu, maibé kontra tiha sistema kakesi no kontrolu morál, tan ne’e la’o la konformiza ho kultura no tradisaun sarani nian. Ez: “liberalismo puro”, nebé namdoras liu ba lala’ok autodefeza ba direitu libertinagem, kumpul kebo, samen leven, children of god, abortismu, eutanazia, lgbt nsst malorek lós.
— Oinsá afirma funsaun morál-étika atu hola-fatin iha diálogu kompromístiku orizontál-fraternál kona-bá aspetu valor umanu sientífiku ho entidade hotu, instituisaun relijioza, organizasaun massa arte-sosio-kulturál sira hotu?
b) Oinsá atu leno nafatin no hatuur Kreda partikular nia Plano Estratéjiku Diocese liuhousi Komisaun Pastorál-Katekese ho oin-foun (…) atu hatan ba dezafiu foun hirak refere ona leten ne’e? Ou karik iha tiha ona, hysu divulga luan liu tan ba.
Ha’u ou ita hotu, ho laran- metin, hein reasaun pozitiva ruma, resposta no komentáriu -badak de’it housi observadór sira, liu-liu, sarani militante sira.
“Que o Divino Espírito Santo nos proteja e nos conceda sua luz e paz. Amem”.
