Lafaek News—Faluk Domingas Bulatoni Viana, fó espresaun ho lian halerik nakonu ho mata-wen ba nia uma ne’ebé kondisaun la di’ak no iha tempu udan tenke hasees nia an ba hela provizóriu iha viziñu, tanba udan been sulin tama uma laran halo nia book an la di’ak no toba la dukur.
Domingas nia kaben fila hikas mundu seluk hafoin nia oan mane dahuluk foin halo tinan 15 iha tempu Indonézia, la rai soin barak ba nia hanesan feto faluk ho nia oan mane mesak ne’e, maibé rai hela mak uma ne’ebé da-daun nia hela hanesan lembransa ida ba nia oan sira nain rua hodi buka rasik han hemu hodi tau matan ba nia oan mane dahuluk ne’e too mane klosan, maibé hela tiha iha Sulawesi Indonézia husik hela inan faluk hela mesak iha uma ne’ebé kondisaun la permite liu ona.
“Ha’u nia kondisaun uma ne’e aat ona, tanba harii iha tempu indonézia nian too de’it agora, uma ne’e kalen dodok hotu ona ,no aat ai-rin sira ne’e mos atu tohar hotu ona, dehan Domingas Bulatoni ba Lafaek News iha aldeia Bekusi suku Bekora, foin lalais ne’e.
Iha entrevista espesial lafaek news ho inan faluk ne’e, katak nia oan mane ne’e mak troka nia aman nia fatin hodi tau matan ba nian inan ne’ebé faluk ne’e, maibé oan mane ne’e hola tiha feto bah alai ho nia feen ba hela tiha iha Sulawesi Indonézia, nune’e laiha ema ida atu laran metin.
” Ha’u nia laen mate iha tempu indonézia nian no ha’u nia oan mane ne’e halo tinan sanulu resin lima, ha’u nia oan mane nee forma ona uma kain más da-daun ne’e nia hela iha sulawesi no ha’u mesak mak agora hela iha uma ne’e,” inan faluk ne’e haktuir.
Uma ne’ebé nia kaben husik hela ba da-daun kalen frozen no kuak hotu ona iha kakuluk, iha tempu udan bee sulin husi uma kakuluk hanesan hanesan bee sulin husi mota halo toba fatin no uma laran tomak nakonu ho bee, pasiénsia tenke halai viziñu nia uma hodi salva a’an husi bokon.
“Uma ne’e kalen kuak hotu ona no bee tama de’it ba uma laran aat liu mak udan ha’u tenke sai tiha ba maun sira nia uma no susar loos atu ha’u tein hodi han, udan mai ha’u tenke ba maun sira nia uma karik sira tein ha’u han ,mak la tein ha’u labele han tamba maun mos iha oan barak,” nia esplika
Domingas esplika ba lafaek news ne’e katak nia loro-loron fa’an dosi no fore rai iha eskola STM Bekora nia oin, maibé sorti di’ak loron ida ema sosa dolar 5, sorti laiha loron ida ema sosa de’it dolar 2, tanba ema barak mak fa’an iha eskola refere.
“Hahán uma laran laiha ha’u ba fa’an sasan iha eskola STM nia oin, no sasan ne’ebé ha’u fa’an sorti diak loron ida ema sosa too $5. sorti laiha loron ida ema sosa de’it $.2, too loraik ha’u fila ba uma de’it, faan sasan sira ne’e mak ha’u bele sosa netik foos saka ida hodi han dala ruma osan laiha ha’u ba sosa haknauk de’it foos rai tein hodi han,” nia hakotu.
Ikus liu faluk ne’e dehan, moris ne’e tenke hasoru susar ho terus, pasiénsia nafatin reza de’it ba maromak hodi husu tulun, loron ruma maromak sei haraik grasa liu husi ema seluk bele mai ajuda iha tempu susar laran, maibé importante maka labele haluha maromak.
Jornalista : Domingas Viana
Editora : Nelya Barros
