Lafaek News – Lider Karismátiku Kay Rala Xanana Gusmao informa, atu atinji papél dezenvolvimentu, foinsa’e sira tenke estuda makaas no labele lakon tempu hodi halimar media sosial, facebook, whatshap no seluk tan.
“Imi nia Matenek Nodi Servii tamba ne’e laos dehan ha’u S1 no la halo buat ida la estuda maibé halimar deit maka sosmed oinsá ita bele atinje objetivu desenvolvimentu nasionál no tamba imi mak povu ne’e presija ba futuru aban bainrua nian no imi mak hatutan luta desenvolvimentu nasional nian,” dehan Lider Karismatiku Kay Rala Xanana Gusmão iha nia diskursu relasiona ho selebrasaun loron masakre 12 de novembru iha salaun Dili Institute of Technology (DIT), kinta (11/11/21).
Lider Karismátiku ne’e informa, joven no estudante sira labele tuur de’it no rona de’it, maibé presiza sakrefika an hodi desempeña netik buat ruma iha rai ne’e, tamba luta ba Libertasaun Nasionál liu ona, nune’e estudante presija maka luta ba desenvolvimentu nasaun ida nian liu husi esforsu estuda no pasiénsia.
“Ha’u husu mós ba dosente sira atu labele hanorin deiit matenek ba sira maibé presiza mós hanorin sidadania ba estudante sira atu bele sai sidadaun ne’ebé mak responsavel tamba ho sira nia matenek no hanoin oinsa mak bele dezennvolve ita nia rain,” informa Nia.
Iha Fatin Hanesan Magnífiku Reitór Dili Institutu Of Technology (DIT), Alvaro M. Amaral, agradese ba lider karismátiku Kay Rala Xanana Gusmão tamba bele fó ona matéria balun no istória ba luta ba estudante sira iha Dili Insitute of Tegnology (DIT), ne’ebé realiza semináriu ba komemorasaun loron Masakre Santa Kruz 12 De Novembro ba dala tolunulu (30).
“Agradese ba lider Karismátiku Kay Rala Xanana Gusmão ne’ebé mak ohin loron hakat mai knua DIT hodi fahe netik materia balun no mós liafuan murak balun mai durante iha semináriu ida ne’e nia laran no espera estudante sira mós akompaña ho di’ak hodi hatene netik no komprende saida mak ita nia Lidér Karismátiku ne’e koa’lia,” hakotu Nia.
Jornalista :Manuel Andrade
Asisten Editora : Juvita dos Santos
