Lafaek News—Prezidente Repúblila, José Ramos Horta, hateten munisípiu Atauru iha istória mitolojia úniku iha Timor Leste, presiza tebes promove potensialidade turístika liu husi festival kultura no múzika hodi dada turista rai liur ba vizita Ataúru.
Horta ho Governu konstitusionál ba daualu, hamutuk ho autoridade, komunidade Ataúru no mós parseiru sira, realiza iha loron 21 to’o 24 fulan Novembru, Festival Kultura no Múzika iha Munisípiu Ataúru, hodi promove potensialidade turístika, atividade kultural, muzika no eventu oi-oin.
Enkuantu, Programa ne’e atu tulun prezervasaun kultural, esplora no transmite ba jerasaun foun, eransa kultural no transforma valor hirak ne’e sei atrasaun turístika, ne’ebé bele apoia dinamizasaun atividade ekonómika iha Munisípiu Ataúru.
“Ataúru istória mitolojia únika no interessante tebes atu explora, sai hanesan fatin ba dadur sira husi kolónia Portugueza to’o okupasaun Indonézia, iha tasi ibun ne’ebé furak, foho Manukoko no potensialidade turístika no sidadaun ne’ebé laran luak tebes atu simu, ema hotu ne’ebé atu vizita husi tasi balun”. Dehan Prezidente Repúblika Josè Ramos-Horta hafoin to’o fatin Festival Múzika Atauro Segunda (21/11/2022).
Eventu ne’e Prezidente Repúblika organiza atu promove duni potensialidade hirak ne’e no hamorin Timor-Leste nia naran iha Mundu, tanba eventu ne’e sei partisipa mos grupu kultural husi Munisípiu 14 no mós husi Indonézia no fiar katak, Festival Kultura no Múzika ba edisaun dahuluk iha Ataúru ne’e, sei sai dinámiku no kontribui mos ba atividade ekonómika.
Entretantu iha Ataúru realiza atividade hanesan: múzika instrumental tradisionál, dansa trandisionál, aprezentasaun filme dokumentáriu, ai-knanoik, desfile traze tradisionál, soru tais, ai-han tradisionál no internasionál, feira livru, artezenatu, expozisaun pintura , Marxa Morador no kuda Ai Mangrove ka parapa.
Iha eventu ne’e Iha mos konkursu hanesan; Poezia no múzika akústika ho tema Manu Kokorek Fanu rai Timor, Pintura kona ba Tasi Timor, Adventure Challenge no Múzika kore metan no mos iha kompetisaun hanesan; halai sa’e foho, kurrida bisikleta BMX, Kurrida Ró no nani Tasi.
“Programa ne’e konta ho apoiu husi Governu no Xefe Gabinete Primeiru Ministru, Sr. Azevedo Marçal mak sai Koordenadór Jerál no Sr. Agusto Junior husi Prezidénsia Repúblika mak Adjuntu Koordenadór, autoridade Munisípiu Ataúru no mós Ataúru oan sira”, deklara Prezidente Ramos-Horta.
Jornalista : Rita Moniz
Editór : Agapito de Deus
