Lafaek News—Prezidente Partidu Kmanek Haburas Unidade Nasionál Timor-Oan (KHUNTO), Armanda Berta dos Santos, husu estrutura KHUNTO iha baze atu servisu makas hodi garante implementasaun polítik partidu nian bele metin ho didi’ak hodi haburas unidade nasionál iha baze ho lema tane o emar no tane o lisan no tane rain.
“Ida ne’e prinsipiu no valores partidu KHUNTO ne’ebé ita hotu hatene no tane as, ne’ebé hakerek ho tinta osan mean nu’udar lema partidu nian katak Tane O Rai, Tane O emar no Tane O Lisan,” Armanda Berta dos Santos hatoo asuntu ne’e iha nia diskursu inaugurasaun sede nasionál partidu KHUNTO iha aldeia Laulora suku Manleuana, domingu (04/07/2021/).
Armanda Berta dos Santos mós rekomenda mós ba militantes no simpatizantes partidu KHUNTO ne’ebé namkari iha Timor-laran atu mantein nafatin disiplina tuir orientasaun konselleru másimu partidu KHUNTO no asegura valores sira hodi bele servi povu iha baze.
“Ha’u hakarak apela ba kuadrus partidu KHUNTO iha estrutura nasionál too munisípiu’ hotu atu sosializa forsa polítika partidu nian iha baze atu bele hametin uindade nasionál hahú duni husi baze nune’e ita bele garante implementasaun polítika partidu ho di’ak no metin
Lider partidu KHUNTO ne’e dehan, nia parte sei la tolera lideransa partidu KHUNTO ne’ebé envolve iha orgaun ezekutivu no lezislativu bainhira viola regras, étika, prinsipiu no valores partidu KHUNTO nian, lideransa KHUNTO ne’ebé envolve iha orgaun rua ne’e ho objetivu fundamental atu servi povu no nasaun, maibé la’os servi an de’it hodi haluha povu kiik sira ne’ebé presiza tebes tulun iha aspeitu dezenvolvimentu.
Iha diskursu Prezidente partidu KHUNTO ne’e hatoo mós nia deklarasaun ofisial hodi afirma nia kandidatura ba Prezidente Repúblika husi periodu 2022-2027.
Iha observasaun jornalista Lafaek News, nota husi diskursu Prezidente Partidu KHUNTO atual Vise Primeira Ministra no Ministra Solidarieade Sosiál no Inkluzaun, Armanda Berta dos Santos, husu de’it estrututra no militantes sira atu sosializa lema partidu, maibé la sita kona-ba polítika partidu nian iha dezenvolvimentu liu-liu setór edukasaun, saúde, agrikultur, sosiál no seluk tan.
Ikus liu, iha serimonia inaugurasaun sede nasionál partidu KHUNTO partisipa husi eis Prezidente Repúbika atual Primeiru Ministru oitavu governu konstitusionál, Taur Matan Ruak ho espoza, Prezidente Parlamentu Nasionál, Aniceto Guterres, Prezidente Komisaun Nasional Elesoens (CNE), Alcino Barris, embaixadór Indonézia iha Timor Leste Sahat Sitorus no membru governu balu inklui kuadrus no estrutura nasional no munisípiu partidu KHUNTO no hetan seguransa másimu husi PNTL kompostu husi BOP no Polísia Tránzitu.
Jornalista : Acacio Pinto
Editór : Agapito de Deus
