Lafaek News (Lautem)—Ekipa Autoridade Protesaun Sívil (APS) munisípiu Lautém, apoiu emerjénsia nesesidade báziku ba uma kain 5 ne’ebé hetan estragus husi anin boot iha aldeia trilolo suku Trilolo postu administrativu Iliomar munisípi Lautém.
Joaquim da Costa hanesan familia afetadu hateten ba jornalista sira katak anin boot sobu nia uma kakuluk iha loron 20 fulan Janeiru tinan ne’e no familia sira seluk nia hela fatin balu mós hetan estragaus.
Joaquim Da Costa apresia no agradese ba apoiu ne’ebé autoridade protesaun sívil fo ba sira atu hakman sira nia sofrementu husi dezastre natureza ne’e.
Xefe aldeia Trilolo Teodoro Pires mos fo agradese ba Autoridade Protesaun Sívil ne’ebé rona ona sira nia lian halerik hodi bele tulun ona vítima sira iha aldeia refere.
Sorin seluk komandante Autóridade Protesaun Sívil, Inspetór Xefe Polísia, Tito da Silva, esklerese katak, apoiu emerjénsia ba uma kain sira ne’ebé hetan estragaus husi anin la’ós iha postu Iliomar de’it, maibé ba postu sira seluk hanesan, Lospalos, Luro, Lautém no postu sira seluk mós.
Entertantu sasán ne’ebé família uma kain sira ne’e simu husi APS Laitém nesesidade hanesan fos kilograma 50, mina bimoli litru 3, ikan Lata, terpal no sasán sira seluk.
Durante anin boot iha Munisípiu Lautém uma komunidade estragus hamutuk 37, iha 15 mak aat kaman no balu seluk la tama kategoria nune’e autoridade protesaun sívil fo de’it ajuda emerjénsia.
Jornallista : CE Lautém
Editor : Agapito de Deus