Lafaek News—Asosiasaun Jornalista Timor-Leste, Timor-Leste Press Union, kondena maka’as aktu agresaun fiziku hasoru jornalista iha kampus Universidade Dili ne’ebé deskonfia komete husi senadu jéral ho nia grupu iha loron 21 fulan Outobru 2025.
Lamentasaun ne’e hato’o husi Prezidente Asosiasaun Jornalista Timor-Leste liu husi konferensia imprensa iha Sede AJTL, Fatuhada, Dili (22/10/2025).
“Jornalista sira nia prezensa iha kampus UNDIL horseik ne’e hodi hakunu konvite atu halo kobertura ba kazu asédiu seksuál iha fatin refere, la’os ba halo krime,”Prezidente Asosiasaun jornalista Timor-Leste, Jevonia Vieira deklara liu husi konferensia imprensa iha Sede AJTL Fatuhada.
Prezidente AJTL ne’e akresenta media ka jornalista sira iha obrigasaun étiku no konstitusionál atu hakunu universitariu sira liu-husi kobertura ba asuntu liga ho kazu violénsia bazeia ba jéneru ne’ebé konsidera mós nudár violasaun direitu umanu.
“AJTL nudár mahon ba jornalista sira kontra maka’as hahalok agresaun fiziku no bulin husi estudante akadémiku husi UNDIL hasoru jornalista sira wainhira hala’o nia papél,” Prezidente AJTL Zevonia Vieira hatoo ba jornalista iha konferensia imprensa iha sede AJTL Fatuhada Dili.
Xefe Redasaun media Neon Metin ne’e afirma Jornalista sira hala’o nia papél lian ba lian laek sira hodi halo kobertura no hato’o kazu ne’e ba públiku atu sobrevivente sira atu bele hetan lia los no justisa.
“AJTL sei foti asaun legál hasoru ema sira komete agresaun fiziku hasoru jornalista sira tuir Lei Komunikasaun Artigu 41,” Nia dehan.
Iha fatin hanesan Prezidente TLPU, Cándido Alves hatutan, hare’e asaun hasoru jornalista sira iha UNDIL liu husi video sente triste tanba estudante akademista sira maka harahun liberdade imprensa.
“Horikalan ha’u hare’e video ne’e hau sente triste tebes tamba liberdade imprensa ne’e la’os ema seluk nak harahun maibe ema akademiku sira ne’ebé koñesementu klean tebes,” Prezidente TLPU ne’e argumenta.
Prezidente TLPU ne’e esplika, tuir lei komunikasaun sosial iha artigu 8 hatete kona-ba direitu jornalista nian atu fo sai informasaun no iha artigu 9 mós kona-ba liberdade espresaun ba ema hotu atu espresa nia direitu no iha semana kotuk, kazu Asédiu seksuál iha Kampus viral loos tamba ne’e akademista taka ba jornalista sira entaun sira iha kanek, Jornalista la’os inimigu maibe jornalista amigu ba ema hotu.
Enkuantu Estrutura Asosiasaun jornalista Timor-Leste no Timor-Leste Press Union enkoraja no hamutuk ho Media Sapnews levanta kazu ne’e ba instituisaun relevante sira hodi tuir prosesu legál.
Jornalista: Ekipa Lafaek News.
