Lafaek News—Negosiante Agusto Soares Correia, idade 49, husi aldeia Venonuk, suku Venonuk, postu-administrativu Metinaru, Munisípiu Dili, sente triste ho impaktu pandemia Covid-19 tanba afeta tebes ba nia rendimentu kada loron, susar atu sustenta ba nesesidade uma laran no oan sira nia estudu.
“Durante iha surtu Covid-19 ne’e ita la’o mai fa’an mós la folin ita obriga aan mai nafatin tanba nesesidade uma laran obriga, hare’e ba situasaun ida ne’e, ita terus no triste los ba situasaun politika guvernu nian tanba atividade fa’an lafatik ne’e rendimentu tun liu lahanesan tempu uluk,” dehan negosiante Agostu Soares ba lafaek news iha terminal Bekora, foin lalais ne’e.
Nia hateten, hahú atividade negosiu ne’e iha tinan 2004, primeiru fa’an uluk ikan, maibé hare’e ba estranjeiru importasaun ikan barak no fa’an baratu de’it, tanba ne’e nia deside fa’an fali lafatik ho luhu to’o ohin loron.
Negosiante haktuir, lafatik ho luhu’u ne’ebé fa’an sosa tutuan husi ema, lafatik ida dollar ida sentavus rua nulu resin lima, fa’an fali dollar rua sentavus lima-nulu, sorti di’ak fa’an iha merkadu ema sosa hotu kedas, maibé leba fa’an de’it iha dalan la sosa, tempu uluk fa’an dalaruma loron ida hetan dollar haat-nulu, maibé agora laiha.
“Rendimentu ne’ebé ha’u hetan ne’e hodi sustenta uma laran no atende labarik sira eskola karik presija buat ruma ita bele hola, ha’u iha oan nain 6, feto 3 mane tolu, ha’u nia oan sira ne’e eskola hotu balun ensinu primaria, pre-sekundaria no sekundaria iha metinaru,” tenik nia.
Alende ne’e mós Agostu preokupa ho dezisaun governu ne’ebé seidauk reativa eskola, tanba durante ne’e nia oan nain neen nunka aprende buat ruma tanba eskola online mós la asesu.
“Eskola taka, ha’u nuadar inan aman senti triste los, labarik sira iha uma atu halo saida, aprende saida sira iha uma los de’it, aula online mós laiha sira atu beik tan de’it, hare’e ba situasaun ida ne’e ha’u senti triste bo’ot, nudar inan aman ita tenki responsavel ba oan eskola mós agora situasaun ida hanesan ne’e ita atu halo saida,” hateten nia.
Nune’e nia husu governu tenke reativa ona eskola atu nune’e oan sira bele aprende, nu’udar inan-aman iha responsabilidade atu buka osan hodi suporta oan sira, tanba futuru oan sira nian importante maibé eskola kontinua taka hela de’it.
Jornalista : Azelio da Cruz/Cresencia Ferreira
Asisten Editór : Pedro de Almeida
