Ermera(LafaerkNews)-Diretór Saúde Munisípiu Ermera, António de Deus, informa, iha Semana ikus Fulan-Marsu nian, estudante Ermera-oan hamutuk 904 iha Dili halai subar-subar hodi liu dalan ilegál tama iha Munisípiu Ermera.
Nunee iha inisiu fulan Abríl nee ekipa Saúde Munisípiu Ermera halo teste swab detekta, hosi totál nee ema nain-19 mak afetadu ba Covid-19.
Hosi dia 2 de Abril, bainhira ita-nia estudante sira ilegalmente halai hosi Dili hamutuk 904. Agora hosi totál 904 nee mak provizóriu ita detekta liuhosi teste swab pozitivu nain-19, informa Antóniu ba jornalista sira iha Edifísiu Autoridade Munisípiu Ermera, Kinta, 08/04/2021.
Nia hatete, bainhira ekipa saúde foti amostra hodi halo teste liuhosi laboratóriu iha Dili hatudu katak pozitivu nain-19, nunee ekipa saúde sira esforsu makaas nunee durante 24-oras nia laran nee pasiente sira tenke enkamina hotu ba iha sala izolamentu neebé prepara ona iha eis komarka Gleno.
Tuir nia katak, estudante hirak nee ho ilegalmente too iha Ermera, maiória fila ba ida-idak nia rezidénsia, tanba nee ekipa saúde prepara daudaun ona atu buka tuir kontaktu besik no aumezmu tempu halo teste swab ba família sira neebé mak vítima sira halo kontaktu direta.
Enkuantu, Sekretáriu Autoridade Munisípiu Ermera, José da Costa Domingus, reforsa liután katak, realidade neebé akontese iha Ermera, Autoridade Munisípiu Ermera neebé kompoin hosi diresaun sivíl no minlitar inklui igreja katólika re-estabelese ekipa Covid-19 nian ho imediata hodi tun ba postu administrativu sira atu informa ba komunidade tomak, katak, moras Covid-19 iha Ermera agora daudaun komesa dezenvolve aas ona iha Munisípiu Ermera.
Tanba ho númeru pozitivu neebé rezista ona hamutuk nain-19 nee, ba daudaun infiltra ona ba komunidade sira iha suku hamutuk 52 no aldeia 2076 iha munisípiu Ermera.
Nunee Autoridade Munisípiu Ermera, husu ba komandatu PNTL no F-FDTL atu nafatin rigór no alertadu durante oras-24 hodi sidadaun hotu obrigatóriu mantein órden tuir Lei Estadu Emrejénsia.
Nunee mós aplika nafatin regra hosi OSM no MS neebé estabelese tiha ona no nafatin limite movimentu sira neebé la kontribui ba regra estadu emerjénsia nian, hanesan jogu manu-futu, jogu sira iha merkadu, atividade bazár merkadu Gleno inklui sup merkadu sira iha postu administrativu lima iha Ermera.
Nunee mós Autoridade Ermera foti desizaun imediata hodi limita halibur malu hanesan iha lia-mate ka lia-moris, limite atividade aula iha eskola sira inklui limite mós atividade rejiozu sira.
“Autoridade Munisípiu Ermera husu! Atu ema hotu nuudar sidadaun responsável iha munisípiu Ermera iha dever morál atu intensifika konsiénxia no hanoin diak hodi labele jeneraliza fali situasaun nee hodi la kontribui ba desizaun Autoridade nian neebé ho objetivu atu proteje povu nia vida,” tenik nia.
Jornalista : Lino Aparicio
Editór : Lino
