Lafaek News-(Kovalima)-Relasiona ho akontesimentu udan no anin boot durante semana kotuk iha fatin hotu-hotu, inklui iha Munisípio Kovalima, mak iha Loron Sábadu semana kotuk (03-04-21) hamosu rai halai hodi rezulta família Amaro Gusmão hosi Aldeia Hatu, Suku Holpilat, Postu Adminstrativu Maukatar, tenke lakon nia hela fatin (Uma).
Amaro Gusmão esplika koronolójia akontesimentu ne’e ba Jornalista Lafaek News, katak, akontesimentu ne’e akontese bainhira udan no anin boot iha Loron Sábadu Semana kotuk (03-04-21) mais ou menus iha tuku 8:40 kalan, rai halai hodi rezulta uma monu.
“Iha momentu ne’ebá udan no anin mos boot, depois akontese iha tuku-ualu (8) kalan, ha’u haree sementi ne’ebé nahe iha laran ne’e nakfera hotu i airin rua tohar hotu, maibé ami ida mós la kanek, tanba ne’e ami labele hela ona iha ne’e, agora ha’u ho ha’u nia oan sira hela fali iha kios ki’ik oan ida. Hau sente triste tebes tanba uma ne’ebé mak ami hela agora monu tiha ona,” haktuir Amaro iha fatin akontesimentu, Tersa feira (06-04).
Nune’e, Amaro Gusmão ho família husu apoiu ba parte relevante sira, tanba uma ne’ebé sira hela daudaun ne’e monu hodi fó ba impaktu família sira tanba hela iha fatin ne’ebé la dignu.
“Ami husu ba estadu atu ajuda netik ami iha tempu difisil ida ne’e, tanba agora daudaun ami hela de’it iha kios ki’ik oan ida, tanba uma ne’ebé ami hela ne’e monu tiha ona,” Amaro informa ho sentimentu tristeza.
Iha fatin hanesan Xefe Aldeia Hatu, Zacarias Gusmão, informa, parte hosi autoridade lokál foti ona dadus hodi enkamina ona ona ba iha Diresaun Dezastre Munisípiu Kovalima (DDMC) atu nune’e bele tulun família vítima ne’ebé hetan dezastre.
“Hanesan Xefe Aldeia Hatu, ha’u foti ona dadus ba akontesimentu ne’e hodi hatama kedas ba Protesaun Sivil, CVTL no MSSI, DDMC atu nune’e ita-nia família vítima sira ne’e bele hetan apoiu liga ho rai halai hodi hamonu sira nia uma ne’e,” nia afirma.
Enkuantu totál família ne’ebé hela iha uma refere hamutuk na’in-lima (5), no uma ne’ebé monu impaktu husi rai halai, ho medida naruk 6 m2, no luan 5 m2, (5×6) no tuir observasaun rai ne’ebé halai ho medida naruk mais ou menus metru 60 resin.
Jornalísta : Tynho Gusmão
Editór : Chamot Nahac
