Lafaek News—Segunda (25/01/21), membru orgaun Konsellu Imprensa realiza eleisaun daruak ba Prezidente foun Konsellu Imprensa, iha ne’ebé ikus mai Virgílio da Silva Guterres, kontinua hetan fiar ho votus tolu (3) hodi kontinua lidera orgaun Konsellu Imprensa ba Periodu 2021-2025.
Prezidente eleitu Virgílio da Silva Guterres, hateten komfiansa ne’e hanesan onra boot ida ba nia atu bele kontinua lidera instituisaun Konsellu Imprensa ba period ba tinan lima.
“Onra boot ba ha’u, hetan konfiansa hodi kontinua tan ha’u nia mandatu ba iha Tinan 2021-2025 nian, Konsellu de imprensa moris atu defende dunik liberdade opiniaun, liberdade espresaun ne’ebé mak sidadaun sira halo,”dehan Prezidente Eleitu Konsellu Imprensa, Virgílio da Silva Guterres, ba jornalista sira iha, Kintal Boot, Segunda,(25/01/2021).
Nia hatutan, iha mos Konselleru na’in tolu, kompostu husi Expedito Loro Dias Ximenes, Otelio Ote, ho Benevides Correia Barros, ne’ebé mak hetan nomeasaun atu kontribui hanesan membru Consellu de imprensa.
Iha fatin hanesan, Expedito Loro Dias Ximenes hateten, la hetan konfiansa ne’e la’ós atu hamenus espíritu kontribuisaun ba iha Konsellu Imprensa.
“Ha’u la hetan konfiansa husi kolega na’in 5 ne’e la’ós ha’u sei hamenus espiritu kontribuisaun ba iha Konsellu Imprensa más hetok makas liután, dala ruma iha avaliasaun iha pontu fraku balu ne’ebé mak presiza atu hadi’a, ou karik iha pontu forte ne’ebé mak presiza atu kontribui ba Konsellu Imprensa,” Expidito argumenta.
Enkuantu iha Eleisaun ne’e hamutuk ema na’in 5 ne’ebé mane reprezenta husi Konsellu Imprensa mak halo votasaun, ema na’in 2 Nomeia husi Parlamentu Nasionál, na’in 2 husi Asosiasaun jornalista sira, no na’in 1 husi media na’in sira, iha Eleisaun ne’e Virgílio da Silva Guterres hetan votus 3 no Expedito Loro Dias Ximenes hetan Votus 2.
Jornalista : Sandi Belo
Asistensia Editór : Egidio Nono
