Lafaek News—Partidu Demokrátiku liu husi Movimentu Profisionais Demokrátiku (PD-MPD) hamutuk ho Juventude hala’o asaun símboliku memoria no esperansa: sunu lilin no prosesaun ba Nosa Senhora de Fátima hodi reza ba dame no ba futuru nasaun.
Atividade ne’e hala’o iha Jardin 5 de Maiu ho objetivu komemora Loron 4 Setembru 1999 aniversáriu Ba dala 25 no mos loron anúnsia rezultadu Konsulta Populár.
Sekretáriu Ezekutivu PD, Jacinto Gusmão, hateten katak MPD nia knaar mak halibur profisionál sira matenek-na’in sira atu kontribui ba dezenvolvimentu nasionál.
“4 Setembru mak loron istóriku. Ami komemora tanba iha loron ne’e mak anúnsiu rezultadu povu nia vota ba ukun rasik an, no iha loron ne’e mós MPD moris. Ami-nia responsabilidade mak kontinua luta ba moris di’ak ba povu no dezenvolvimentu ba ita-nia rai doben, tuir espíritu eroi sira-nia sakrifisiu,” Jacinto Barros ba jornalista sira iha Jardin 5 de Maiu Faról, Sesta-feira, 04 setembru 2026.
Iha fatin hanesan Presidente MPD Joãozinho da Conseição hateten kada tinan, povu Timor-Leste sunu-lilin iha 4 Setembru hanesan símbolu memoria ba mártir sira no mós naroman ba esperansa. Naroman ne’e fó responsabilidade ba jerasaun ohin loron atu kontinua kuda naroman liuhusi edukasaun, dame, unidade, demokrasia no dezenvolvimentu.
“4 Setembru la’ós de’it atu hanoin fali istória. Loron ne’e fó hanoin ba ita hotu katak liberdade presiza alimeta loroloron ho responsabilidade, servisu maka’as no unidade ba dezenvolvimentu Timor-Leste. Sunu lilin ne’e hanesan símbolu memória no esperansa,” dehan Joãozinho.
Prezidente MPD husu ba joven sira atu labele haluha loron istóriku 4 Setembru mak loron ne’ebé Timor-Leste deside demokratikamente hakarak ukun an, Iha loron ne’e joven, inan-aman barak sakrifika sira-nia moris.
“Tanba ne’e ha’u apela ba juventude iha munisípiu hotu-hotu atu selebra nafatin loron importante ida-ne’e,” tenik Joãozinho.
Partidu Demokrátiku tau ona 4 Setembru iha kalendáriu planu anuál nian atu selebra kada tinan, tanba loron ne’e mós loron fundasaun ba MPD.
Jornalista: Gracia Soares
