Lafaek News—Sarani tomak iha mundu halo reflesaun Jesus nia terus mate iha Krúz Santa tamba ema hotu nia sala liu husi dalan Krúz, Padre Parokia Maria Auxiliadora Comoro, Nelson Gonçalves SDB ho sarani sira hala’o viasakra iha Golgota Comoro hodi reflete ba Nai Jesus nia sofrementu.
Pe. Nelson Gonçalves hatete ohin sarani hotu hala’o estasaun 14 ne’e interesante tebes tamba ita duni mak hakanek maromak nia fuan, maibé iha mós feto Verónica ne’ebé hamoos Nai Jesus nia oin ne’ebé nakonu ho kosar no raan i Simão Sireneo mós hakmaan Jesus nia sofrementu hodi nia Krúz.
“Iha Estasaun sanulu resin haat ne’e mos hatudu ita nia peregrinasaun iha mundu ne’e, buat hotu ne’ebé ita hala’o la’os buat hotu la’o di’ak de’it maibé Jesus nia sofrementu, Jesus nia moris sai mós hanesan ita nia mesias. Iha buat di’ak iha mós buat ne’ebé ladun di’ak maibé ita tenke luta, hanesan Jesus lao to’o fim, estasaun sanulu resin haat mate iha ne’eba tamba ita nia sala i hetan mós moris hias domingu resuresaun. Nune’e mos ita ema ne’ebé sofre, sofrementu la’os liafuan ikus maibé Jesus nia domin, Jesus nia esperansa mak ita hotu nia liafuan ikus,” Padre Nelson Gonçalves SDB. Ba Jornalista sira hafoin dalan Krúz iha Kalváriu Golgota 3/04/2026.
Nia haktuir ho maromak nia lia-fuan di’ak, sarani sira lalika tauk wainhira hasoru problema, difikuldades mai ita tau sofrementu hamutuk ho Jesus nian, hanesan nia-rasik mós dehan “Imi hotu besik mai ha’u, sei fo naha kamaan ba imi atu imi bele lori atu nune’e hetan salvasaun iha loron ikus”.
“Husi kuaresma to’o mai iha pontu ida ne’e, importante ba dala uluk mak ita buka Maromak, rona mós ita nia maluk ne’ebé presiza ita nia tulun; eveita liafuan ne’ebé soke ita nia maluk sira nia fuan, eveita liafuan ne’ebé oho ema ka desmotiva ema nia hanoin; mai ita hamutuk lolo liman ba malu hodi hari’i reinu ida, rai ida ne’ebé nakonu ho domin Dame no Justisa. Ita hotu Espera katak Jesus nia moris hias sai razaun mos atu moris hias nian atu iha mudansa iha ita nia moris, i ita nia moris sai prezente ida ba ita nia maun alin sira iha uma laran, ba sosiedade, igreja no nasaun,” Amu Nelfon afirma.
Iha fatin hanesan Conselho Diretiva Parókia Maria Auxiliadora Comoro Fernando da Costa haktuir loron ida ohin ne’e importante tebe-tebes ba sarani tomak iha mundu tuir dalan Krúz hodi reflete katak Jesus terus to’o mate iha Krúz tamba ema hotu nia sala no hanoin fila fali Kristu nia moris tamba ita.
“Ohin espesial liu ba hanoin Jesus nia terus i Jesus mós dehan ita sarani mós lori ita nia Krúz loro-loron iha ita nia moris tomak atu refleta nafatin Jesus nia terus, ita reflete nafatin ita nia sakrifisiu iha mundu ida ne’e reflete ho Krúz ne’ebé ita lori iha ita nia moris. Hanesan Jesus dehan “imi ida-idak lori imi nia Krúz lao tuir hau” entaun sentimentu ohin ne’e profunda no klean tebe-tebes katak nu’udar sarani reflete ba iha moris ne’ebé ita hasoru, no moris ne’ebé mak ita infrenta iha familia, iha sosiedade iha ne’ebé deita atu reflete fila fali katak tamba saida no oinsa Jesus lori Krúz todan hanesan ne’e tamba ne’e oinsa mak ita ema halo refleksaun ba ita ida-idak nia moris atu bele emita tuir Jesus nia terus no moris ne’ebé Kristu hasoru,” dehan Konsellu Diretiva Fernando.
Brígida da Silva mós konfesa Viasakra ne’e lori ema nia pensamentu devosaun ba Nai-Salvador Jesus Kristu ne’ebé terus-mate iha Krúz tamba ema nia sala.
“Nu’udar Sarani mai tuir Viasakra ne’e ho sentimentu pronfuda katak Jesus mate tamba ita ema nia sala i iha momentu ida ne’e mak ita reflete ita nia hahalok sira durante ita halo iha ita nia moris ne’e mak halo krúz todan ba Maromak oan,” dehan Brigida.
Iha Viasakra ne’e Jornalista Lafaek News Observa, sarani sira ne’e husi labarik no ferik katuas, relijiozu, relijioza, organista THS-THM, Eskuteiru husi Parokia Maria Auxiliadora Comoro no sarani sira ho devosaun duni hodi tuir dalan Krúz husi estasaun 1 to’o 14 iha Kalváriu Golgota. Viasakra ne’e iha mós kada grupu organizadu bairu sira hodi sae ba Kalvariu hosi tuku 6, remata iha tuku 12.
Jornalista: Gracia Soares
