Lafaek News— Sekretariu Estadu Formasaun Professional no Empregu (SEFOPE) segunda (20/10/2025), simu embaixador Nova-Zelándia iha Timor Leste inklui empregador hosi nain-tolu hodi diskute sobre asuntu Timor-oan sira atu ba servisu iha nasaun Nova-Zelándia.
Diretor Jerál formasaun Profesional Emprego, Carlito do Rosario Cabral hateten objetivu ba vizita ne’e atu diskuti kondisaun preparasaun atu nune’e iha futuru empregador sira husi Nova zelandia rasik mai rekruta Timor oan Sira ba servisu iha Nova zelándia.
“Enkontru ohin SEFOPE simu delegasaun husi nasaun Nova-Zelándia no reprezenta governu Nova-Zelándia no empregador husi Nova-Zelándia akompaina husi embaixadora, sira mai vizita hodi haree ita nia kondisaun oinsá ita nia prepasaun hodi ba oin sira rekruta ita nia joven sira, tan ne’e mak sira hakarak mai rasik ita nia fatin iha futuru atu rekruta Timor oan Sira ba servisu iha area hortikultura no agrikultura,” Diretór Jerál SEFOPE, Carlito do Rosario Cabral ba jornalista sira iha salaun enkontru SEFOPE, Segunda 20/10/2025/.
Tuir nia, delegasaun Nova-Zelándia sei vizita sentru formasaun sira iha munisipiu tolu atu haree esperénsia joven sira nian nune’e halo kooperasaun hodi rekruta joven sira ba servisu.
“Aban parte SEFOPE sei akompaina Sira vizita munisipiu tolu hanesan Aileu, Ainaro no Ermera no vizita Kafé iha Railako ho sentru formasaun iha Dili laran hodi haree kona-ba fatin sira baibain prepara ita nia traballador sira nia esperensia hodi rekruta sira,” tenik nia
Iha fatin hanesan Embaixada Nova-Zelándia ba Timor Leste, Embaixadora Helen Tunnah informa, vizita ne’e importante atu nune’e Timor Leste ho Nova-Zelándia servisu hamutuk hodi implementa programa mobilidade laborál ba Nova-Zelándia nian.
“Husi vizita ida ne’e mak atu ita nia ekipa husi Nova-Zelándia hotu aprende kona-ba Timor-Leste, ita nia povu, ita nia nasaun no ita nia kultura sira sei vizita area hortikuktura no sei hasoru malu ho offisiál importante sira husi Timor-Leste, ida ne’e hanesan pasu tuir mai iha implementasaun ba ita nia programa foun no iha tempu badak bele lori traballador Timor-oan sira ba Nova-Zelándia.
Jornalista : Moises Guterres/Ana Maria
