Lafaek News—Sekretariu Estadu Komunikasaun Sosial, Expedito Dias Ximenes, afirma servisu media officer nian mak atu halo komunikadu imprensa ba ministériu nian no halo kobertura ba servisu ministru ida nian, la’os halo fali servisu hanesan jornalista.
Expedito hatoo asuntu ne’e hafoin reuniaun ho jornalista inklui media officer ministériu sira iha salaun Maria Gorreti Sekretariu Estadu Igualdade Kaikoli Dili, tersa 29/07/2025, kona-ba lala’ok media officer nian ne’ebé dala ruma taka dalan ba jornalista professional sira atu halo kobertura.
“Enkotru ne’e hamutuk ho media officer sira kona-ba sira nia kontribuisaun no involve iha parte informasaun iha liña ministeriais idak-idak nian, media officer tenki halo komunikandu imprensa iha ministériu idak-idak nian oinsa bele lori informasaun husi ministériu nian servisu loron-loron liu husi pájina ministériu nian, husu mos atu halo diferensa entre media officer no Jornalista, media officer nia servisu oinsá atende ministériu, Jornalista atu halo Kobertura hodi bele atu ba publika husi meus Komunikasaun ne’ebe iha,” SEKOMS Expedito Dias Ximenes akresenta.
Governante ne’e reafirma katak, dalabarak media officer halo tiha kna’ar hanesan jornalista, iha impedementu balun dalabarak halo jornalista sira labele halo kobertura tanba media officer sira taka hotu ho sira nia photographer iha oin, tanba ne’e banhira media officer nia ministro hola parte iha eventu nasional ruma automatikamente sira tenke hetan ID card no atu bele hola parte iha eventu sira.
Entertantu ne’e mos Efejenia da Costa husi media official Arte no Cultura hateten ho enkontru ida ne’e bele fasilita ona oinsá atu hala’o servisu iha eventu ruma liliu iha eventu nasional no internasional sira, papel media officer nian mak atu atende ministru nia atividade loro-loron.
“Iha reuniaun ne’e hodi fo hanoin liliu ami sira ne’ebe hala’o kna’ar hanesan media iha liña ministreriais sira, hodi halo avaliasaun ba ami nia servisu frakueza ne’ebe ami inferenta, iha atividade ne’ebe ami halo liput, liu husi informasaun ne’ebe bele fasilita ami, wanhira ami hala’o ami nia servisu tuir saida mak ami hetan husi inkontu ne’e, ita nafatin kolabora hơ jornalista sira atu nune, bele hetan informasaun ne’ebe di’ak husi media officer,” Efejenia haktuir.
Entretantu, Sekretario Estadu Komunikasaun Sosial, Expedito Dias Ximenes mos intrega user ho password Sistema Desiminasaun Informasaun Intergrado (SDI) ba media nasional no media officer sira hotu atu bele halo kontaktu dijital liu hosi website Sistema Desiminasaun Informasaun Intergradu.
Jornalista -Moises Guterres/Maria Joséde Jesus
