Lafaek News—Domingo loron 6/08/2025 ahi han aman faluk José Mozinho nia uma iha oras 2 haleu 2:30 Otl, iha akontesimentu ne’e idozu ninia sasan uma laran hanesan ropa, bikan, kanuru, sanan no seluk labele salva tanba laiha ema ida atu ajuda.
Idozu José Mouzinho moris mesak (la forma uma kain) dezde nia sei idade joven too ohin loron, no hela mesak iha ailaran tuan entre area bematua no Lelaus nia okos, laiha ema ruma ne’ebé hela besik nia hodi tau matan ba faluk José ne’ebe ho naran istimadu Avo Jé,
Akontesimentu ne’e iha loron Domingu oras tuku 2, komunidade balun iha area aldeia Lemorana parte aibubur-laran, sira haree derepente ahi-suar maka’as sa’e iha area mota sorin, nune’e komunidade hirak labele konsege halai too iha fatin akontesimentu hodi hamate ahi, ho razaun dook liu hosi sira nia hela fatin, tan ne’e sira deside husik de’it ahi han avo faluk ne’e nia hela fatin.
Avo Jé hanesan uma nain haktuir ba Lafaek News katak, iha momentu ne’eba, iha tuku rua loron manas, nia ba kuru tiha bee, derepente nia foti matan hosi bee matan hateke sa’e ba nia uma ahi lakan boot tiha ona, nune’e nia halai sa’e ba tama uma laran hodi salva Kruz joven, fatuk rua hodi asegura hosi ahi ne’e.
Nune’e, iha akontesimentu ne’e avo José Mouzinho konsege foti sai de’it sasan sagradu luhu,f atuk lulik metan ho mutin ida katizmu, kruz Joven inklui imajen Nain-feto nian tahan 4 ne’ebé sai hanesan mahein ba uma ne’e.
“Ha’u tun ba kuru be’e iha be’e matan, derepenti ha’u hateke sae ba, ahi han ona entaun, ha’u halai sa’e ba tama uma laran ha’u foti de’it mak ha’u nia sasan sira hanesan fatuk rua, Katizmu, Cruz Joven ida ha’u tau iha luhu lori halai sai mai too iha odamatan ahi monu kona ha’u nia liman no kakorok manas kakenek hotu, entaun ha’u halai sai mai ahi suar tama hotu ha’u nia matan, ha’u haree rai mos la di’ak Ha’u lori liman hamos Ha’u matan halo mos foin halai tun mai entaun Ha’u halai de’it tun mai Ema iha karaik ne’e mak tula fali hau tun tiha mai ne’e,” Avo José Mouzinho hatoo ba Lafaek News iha aldeia Rio de Janeiru Bairo-Pite, segunda (07/07/2025)
Komunidade aldeia Lemorana, suku Dare Oscar Andrade mos haktuir, katak iha oras 2:30 derepente rona ema hakilar lian hosi foho Lopis ninia sorin no derepenti hateke ba ahi lakan makas no antes antes viziñu ne’ebe hela besik avo José too ba sasan uma laran ahi han hotu ona no labele salva sasan uma-laran
“Iha tuku rua ne’e ami lalin hela rai-henek iha sorin, tanba meudia ona ami mos han hafoin atu han derepente ami rona sasan tarutu iha sorin ami hakfodak hateke ba ahi-han uma iha sorin, entun ami hateke tesik mai ahi-lakan makas loos entun ami tesik mai como dook entaun ahi han mutuk hotu ona no sasan uma laran ida mos la salva antes ami to mai avo José sai tiha ona ba ne’ebe ami mos la hatene,”sasin ne’e haktuir.
Maibé Avo José nia oan hakiak ho naran Arlindo Goncalves Vieira hateten ahi han uma ne’e dala ruma Avó Jose tein la kontrola ahi hodi akontese ahi han uma refere.
“Antes ne’e katuas iha uma ne’e dader nia hakarak ba ona foho nia haruka hola modo ayam potong ida nia lori ba halo modo, la kontrola ahi nia ba kuru tiha bee fila mai ahi han ona uma ne’e entaun nia tama ba foti de’it fatuk sagrado ho imajen nai Cruz joven ho imajen nain feto ida .” haktuir Arlindo Goncalves Vieira.
Entretanto xefe aldeia Rio de Janeiro Gaspar, Saldanha Soares afirma Ahi-Han uma ne’e nia parte seidauk simu relatóriu no informasaun ruma hosi Komunidade iha fatin refere.
“Ha’u rasik la hatene, tamba ahi han ne lokaliza iha tiha suku Dare, ne’ebé ha’u seidauk hetan relatóriu ruma husi vítima, nudar autoridade ha’u nia atendementu ba Jose Mouzinho hanesan sidadaun aldeia Rio de Janeiro, Jose hela iha Dare hanesan fatin tos nian, maibe Jose hela iha ha’u nia aldeia hamutuk ho nia oan sira, no José agora dadaun simu hela Pensaun Idozu too agora,” Xefe aldeia Rio de Janeiru suku Bairo-Pite ne’e informa.
Antes ne’e aman faluk José Mouzinho hela iha aldeia Rio de Janeiro suku Bairo pite Postu Admistrativu Dom Aleixu municipio Dili, tanba aman nee hela iha suku Dare nia okos, ne’ebe kuinesido ho Lopis aman ne’e iha oan mane hakiak ida ne’ebe ho aman ne’e hela iha barraka simples ida hodi buka moris hanesan ai-leba ne’ebe sempre leba produtu local sira mai buka moris iha Vila-Verde no Bairo-pite.
Jornalista : Maria José de Jesus
