Lafaek News—Rezultadu final monitorizasaun hosi orgaun Konsellu Imprensa Timor Leste, dadus hatudu Lafaek news nudar media ida ne’ebé okupa fatin daruak promove asuntu social no inkluzaun inklui sensivel ba jéneru iha Timor Leste, no la kontra kode étika.
Rezultadu monitorizasaun ne’e Konsellu Imprensa nia servisu perante periodu 2024 nian ba media nasional sira ne’ebé hala’o kna’ar ba interese públiku nian hodi fornese informasaun rai laran no rai liur liu hosi kanais ida-idak nian.
Monitorizasaun ba asuntu kontra kode étika iha tinan 2024 no promove Igualidade Jéneru iha tinan 2025 husi monitorizasaun Konselho Imprensa hatudu media online lafaek news la kontra kode étika Jornalismu no Lafaek News mos promove Igualidade Jéneru tama iha pursentu 26 no media Tatoli okupa primeiru lugar.
Rezultadu monitorizasaun ne’e fo sai hafoin Konsellu Imprensa aprezenta matéria ho tema Jornalista ho etika Iha salaun Maria Gorete Kaicoli Obrigado barak nian, sesta (13/06/2025).
Iha fatin hanesan, Diretor ezekutivu media online Lafaek News, Agapito de Deus, nia parte rekoñese monitorizasaun hosi orgaun Konsellu Imprensa nian bazeia ba publikasaun sira ne’ebé media ne’e publika loro-loron intermus asuntu social no inkluzaun iha rai laran ne’ebé eziste iha areas remotas no rural sira.
“Ha’u sente kontente uituan tanba ami livre la kontra kode étika jornalismu iha tinan 2024 nian tuir evaluasaun ne’ebé Konsellu Imprensa fo sai, liga ba asuntu social no inkluzaun ida ne’e sai prinsipiu fundamental iha redasaun Lafaek News dezde eziste tuir lema lian hosi povu, signfika asuntu social no inkluzaun ne’e mak prioridade iha kobertura lafaek news nian loro-loron,” Diretor Lafaek News espresa iha nia kna’ar fatin Lafaek News Matadoru Dili, sesta (13/06/2025).
Jestor Lafaek News ne’e husu ba jornalista sira atu mantein ho prinsipiu no polítika redasaun lafaek news, maske hasoru difikuldade atu hala’o kobertura iha areas remotas no rural iha territoriu tanba kestaun fasilidades la sufisiente atu fasilita jornalista sira tuun too baze, maibé kontinua nafatin ba oin, difikuldade la’os bareira, difikuldade mak dalan susesu ho maduru hodi kontinua hakat ba oin.
Entretantu, dezde ezistensia Lafaek News kobertura espesial liu iha notisia social, inan faluk, katuas no ferik sira, ema ho defisiensia ne’ebe moris marzinalizadu iha remotas, no hetan mos prémiu direitus umanus Maria Gorreti tinan tolu tutuir malu hosi 2021, 2022 no 2023.
Jornalista : Maria José de Jesus
