Lafaek News—Estudante hosi Universidade Nasional Timor Loro sa’e fakuldade enjenária no siensia teknolojia, Emilia Martins Simoes, hateten rai doben Timor Leste, hamrik mesak tinan 23 ona, tanba sa kamu servisu iha rai laran zero total.
Estudante UNTL ne’e nia pergunta ne’e refleta kedan ba situasaun polítika iha rai laran ne’ebé la favorese no la refleta ba ezijensia povu Timor Leste, kiak ba servisu no kontinua moris iha kondisaun ekonomia krítiku.
“Hanesan joven foin sae ha’u senti teriste Timor ukun rasik an ba 23 maibe menus kapo de trabalho barak ba joven sira ita hare katak agora da-daun joven barak mak sai ba rai liur hanesan Inglaterra, Austrália Korea, hanesan joven ha’u senti teriste, hakarak iha loron ida ne’e Timor Leste halo ona restaurasaun ba tinan 23,” Emilia Martins Simões ba Jornalista Lafaek News tersa, iha Jardin 5 de Maiu, 20/05/2025.
Husu mos ba governu ne’ebé ohin loron IX governu konstitusional, lideradu Kay Rala Xanana Gusmão, atu kontrola membru governu sira hodi ezekuta osan povu nian ho didi’ak, atu nune’e lori benefisiu duni ba povu no hadia rai ne’e sai kualidade ho nune’e joven sira labele sai ba servisu iha ema rain.
“Loke servisu iha rai laran atu Joven barak lalika sai ba liur, ha’u nia mensajen ba iha joven sira ne’e, Timor Leste ida ne’e hapara problema ne’ebe sempre mosu iha bairo sira, hanesan arte-marsiais sira, tan ne’e husu ba Joven sira ne’e hapara problema atu nune’e ita moris iha pas no dame nia laran,” nia salient.
Iha fatin hanesan, estudante UNTL, Angelisio da Costa Miranda hateten komemorasaun katak 20 de Maiu 2025 nian kompleta ona tinan 23 hanesan joven ida ne’ebé komesa hanoin luan da-daun, maibé inan-aman hanesan estadu la loke oportunidade atu joven ne’e bele servisu hodi moris.
“Ita nia ukun an ba dala 23, ha’u espera katak ita nia nasaun nudar joven bele kompete ho nasaun sira seluk, kria paz, ita ukun an tinan 23 ona, maibe menus kampu servisu, tan ne’e ho haraik an husu ba Governu atu loke kampu servisu barak atu estudante sira bele hatudu sira nia skisl durante sira aprende iha universidade sira, tanba estudante barak remata ona estudu, la kontinua servisu iha sira nia area, maibé sai fali serbisu iha ema nia nasaun,” nia akresenta.
Lia-fuan ikus hosi joven ne’e katak, Timor Leste nasaun ne’ebé kiik, fasil atu hadia iha tinan lima, más realidade nasaun ne’e la ba oin, nai ulun sira tenke halo reflesaun, servisu ho lolos no momos hodi servi povu no servi nasaun, halakon arrogansia no korupsaun atu labele sakrifika bebeik povu kiik sira.
Jornalista : Maria José/Jonaida Corte Real
