Lafaek News—Sekretáriu Jerál ONU ne’e rekoñese Xanana Gusmão nu’udár líder transformadór ne’ebé transforma Timor-Leste sai hanesan país independente, país demokrátiku, país respeitadór direitus umanus no país ne’ebé iha influénsia internasionalmente.
Guterres afirma, Nasaun Unidas iha ninia limitasaun kapasidade, maibé ho empeñamentu totál, inteiramente ONU hamutuk ho Governu Timor-Leste, no tuir duni estratéjia Governu Timor-Leste nian hodi bele apoia vitória batalla dezenvolvimentu.
“Ha’u sente impresionadu tebes kona-bá deskrisaun ne’ebé Primeiru-Ministru halo liga ho esforsu renovadu liu-liu bá matéria seguransa alimentár liu-hosi investimentu iha seitór agrikultura. Klaru katak, ida-ne’e sai hanesan dezafiu krusiál ida iha êxitu estratéjia dezenvolvimentu,” António Guterres ba jornalista sira hafoin enkontru, Primeiru Ministru Kay Rala Xanana Gusmão iha Palasiu Governu, 29/08/2024
Nia mós impresionadu ho kompromissu ne’ebé espresa hosi Primeiru-Ministru Xanana Gusmão liga ho asuntu edukasaun no saúde, ne’ebé interesante tebes ho vizaun kona-bá infraestrutura inklui kapasidade atu hili no deside saida mak povu ne’e tenke halo.
“Ha’u sente impresionadu ho realidade katak Timor-Leste nu’udár Estadu kiik, Portugál mós Estadu kiik, ne’ebé iha kapasidade espertu no rekoñesidu internasionalmente no presiza tebes atu defende,” Sekretáriu Jerál ONU ne’e hatutan.
Timor-Leste hanesan mós membru Organizasaun Mundiál Komérsiu (OMK), nu’udár fundadór G7+ ho influénsia ne’ebé mak boot iha diskusaun nível komunidade internasionál Nasaun Unidas nian, Timor-Leste sei sai hanesan membru ASEAN, iha ne’ebé António Guterres espresa katak bele iha influénsia ho papél importante ida bá populasaun iha Myanmar.
Sekretariu Jerál (ONU), António Guterres konsidera Timor-Leste nu’udár lian ne’ebé hetan respeitu no ondra iha Nasaun Unidas, no mós konsideradu liu iha futuru simeira, sei esforsu atu diskute reformasaun importante nune’e institiuisaun sira multilaterál nian bele responde problema sira iha tempu ohin loron nian, mudansa klimátika, dezafiu sira kona-bá intelijénsia artifisiál no mós norma dezigualdade ne’ebé akontese iha mundu tomak.
ONU konta mós ho Timor-Leste ninia lian iha futuru simeira, konta mós Timor-Leste nia lian iha esforsu hotu-hotu atu halo mundu ne’e sai mundu ida ne’ebé respeita knaar Nasaun Unidas nian, respeita lei internasionál iha ne’ebé deziguladade no injustisa sei kontinua akontese no ikus-mai bele enfrenta ho determinasaun no solidariedade.
Iha fatin hanesan, Primeiru-Ministru (PM), Kay Rala Xanana Gusmão sente kontente tanba Sekretáriu Jerál ONU, António Guterres mai Timor, hamutuk ho povu TL iha selebrasaun tinan 25 referendu.
lideradu IX goveno konstitusional PM Timor Leste hanoin Fila fali katak, iha tempu ne’ebá, António Guterres nu’udár Primeiru-Ministru Portugál nian mak dudu partisipasaun Portugál iha negosiasaun ONU hodi konsege hamosu akordu 05 maiu no simu Indonézia atu halo referendu iha ne’e.
“Agradese tebes bá apoiu, la’ós de’it hosi Governu Portugés ne’ebé António Guterres nu’udár Primeiru Ministru iha momentu ne’ebá, maibé mós bá solidariedade povu Portugés nian ne’ebé halo ita fiar katak ita sei ukun an,” Xanana Gusmão hateten.
Durante enkontru ne’ebé akompaña husi membru IX Governu Konstitusionál, Xanana Gusmão ho António Guterres ko’alia kona-bá relasaun entre RDTL ho Nasaun Unidas no Sekretáriu Jerál deklara katak saida de’it mak TL presiza, ONU sei fó apoiu tomak.
Jornalista : Aniceto Dias
Editor : Agapito de Deus
