Lafaek News—Cruz Vermelha Timor Leste (CVTL) halo kooperasaun Cruz Vermelha Internasionál ICRC fasilita treinamentu ba jornalista Timor Leste hodi aumenta sira nia kapasidade ba primeiru sokorus oinsá halo atendementu ba dezastre ne’ebé mosu iha sosiedade nia leet.
Sekretáriu Jerál Cruz Vermelha Timor Leste (CVTL), Luis Pedro Pinto hateten, iha abertura treinamentu ne’e CVTL halo kooperasaun ho Cruz Vermelha Internasionál ICRC no hodi hasa’e koñesimentu ba jornalista iha Timor Leste kona-ba primeiru sokorus, ne’ebé durante mosu iha sosiedade no jornalista sira oinsá asegura an no ba ema seluk ne’ebé hetan asidente iha públiku.
“Husi CVTL servisu hamutuk ho Cruz Vermelha Internasionál ICRC halo organiza formasaun primeiru sokorus sira ne’e para ba iha kolega sira jornalista media hotu-hotu iha Timor laran para atu amenta sira nia koñesimentu entermos primeiru sokorus tanba iha situasaun konflitu iha situasaun dezastre naturais situasaun normál hanesan asidente sira media nia papel importante teb-tebes tanba sira tenke tun terrenu, tenke tun ba fatin akontesimentu oinsá para atu ajuda ema seluk no ajuda sira nia an rasik, dehan sekretáriu jerál Cruz Vermelha Timor Leste (CVTL), Luis pedro Pinto iha Formoza loron tersa feira, (19/03/2024)
Alende ida ne’e mós media Timor Leste sai parseiru di’ak ho Cruz Vermelha Timor Leste (CVTL) hodi sai fatór importante ba jornalista Timor Leste hodi divulga informasaun ba sosiedade hodi asegura ida-idak nia an, oportunidade ida ne mós ba depende komunidade sira ne’ebé iha vontade hodi asegura ida-idak nia an, dehan Sekjen CVTL
“Mesmu tempu mós media sai fatores media iha sai importante parseiru di’ak ho CVTL, tan ne’e mak ha’u hanoin kooperasaun ida ne’e ha’u hanoin tenke la’o atu bele kolega sira husi jornalista hotu-hotu iha koñesimentu ne’ebé naton ba primeiru sokorus ba ajuda sira nia an rasik nune’e mós ba ajuda sira nia instituisaun no mós ba komunidade sira ne’ebe sira serbí ba oportunidade ida ne’e mós husu ba média sira hotu hodi kontinua divulga informasaun sira ne’e ba ita nia komunidade sira hodi hasa’e sira nia koñesimentu sira mós bele hetan oportunidade formasaun i buat hirak ne’e mós depende ba ida-idak nia vontade” katak nia
Iha sorin seluk reprezentante Konsellu Imprensa Timor Leste, Isabel Maria Fernandes de Jesus, argumenta KI agradese ba CVTL, liu husi treinamentu ida ne’e importante tebes hodi kapasita jornalista ho matéria primeiru sokorus hodi asegura ida-idak nia an bainhira iha terrenu no komunidade sira ne’ebé hetan dezastre naturais.
“Ha’u hanoin kapasitasaun ba rekursus umano ne’e importante tebes liu-liu liu husi formasaun sira tanba ne’e reprezentante Konselho imprensa agradese ba iha CVTL ne’ebé mak iha ona kooperasaun di’ak hodi hanoin halo kapasitasaun ba belun jornalista sira liu husi media oi-oin” dehan reprezentante Konsellu Imprensa ne’e.
Antes ne’e Konsellu Imprensa iha ona kooperasaun di’ak ho CVTL hodi kapasita jornalista sira iha nasionál no destakadu iha Munisípiu liu husi programa CVTL ba primeiru sokorus.
“Tanba ne’e ha’u hanoin kooperasaun ida ne’e la’ós foin ohin de’it maibé ita iha ona. Kooperasaun antes ne’ebé maka bele kapasita jornalista sira i antes ne’e mós kapasitasaun ba iha belun sira ne’ebé destakadu iha munisípiu” hateten nia
Observasaun husi media jornalista Lafaek News iha terrenu ba partisipantes ne’ebé husi media oioin inklui mós media estatal sira, RTTL.Ep, Tatoli.ip, GMN TV, Lafaek News, neon metin, Timor post, Citizens, KI.
Jornalista : Aniceto Dias
Editor : Agapito de Deus
