Lafaek News—Polísia Nasional Timor Leste, sesta (15/03/3034) hala’o asaun karidade ba Asosiasaun Halibur Defisiénsia Matan Timor Leste ho Uma Mahon iha ámbitu selebra aniversáriu ezisténsia PNTL ba dala 24 ho tema PNTL ida ne’ebé professional no rejilente.
Komandante Jeral PNTL Henrique da Costa nia espoza akompania hosi segundu komandante munisípiu Dili, hala’o asaun karidade ba ema ho defisiénsia no oan kiak sira ne’ebé halibur hela iha uma mahon Balide Dili.
Iha vizita ne’e Komisáriu PNTL Henrique da Costa esplika, PNTL iha ona formasaun másimu hodi proteze no asegura ema ho defisiénsia sira iha Timor Leste, tanba ema ho deifsiénsia mosh ola parte iha sosiedade ida ne’ebé presiza fo atensaun iha rai doben ida ne’e.
“Sira mos parte husi sosiedade parte husi komunidade ida ne’e, Ita presiza fo atensaun espesial ba sira, alende ne’e, dala ruma sira fasil atu nune’e sai vítima ba krime sira no sai mos vítima ba atendimentu iha polísia, Ita mos hetan treinamentu liu-liu ba sira ne’ebé parte investigasaun treinamentu espesiál oinsá bele mos atende ba iha komunidade sira ho defisiénsia ninian, tema ba iha ita nia aniversáriu ba iha Polísia nian mak PNTL ida ne’ebé Profissional no Rejilente, Profissional intermu de atendementu, Ita rejilente hodi atua ba iha kualker situasaun ne’ebé mosu,” Komandu Jeral Henrique Da Costa, haktuir ba jornalista hafoin oferese nesesidade báziku ba komunidade defisiénsia sira iha AHDMTL no Uma Mahon Balide.
Hodi dehan, iha vizita ida ne’e atu ajuda ema ho difisiénsia no komunidade ne’ebé vulnerável sira iha ámbitu aniversáriu PNTL ba dala 24, aproveita tulun komunidade defisiénsia ho vulnerável sira tuir forsa PNTL nia kapasidade.
Iha sorin seluk Diretór Asosiasaun Halibur Defisiénsia Matan Timor Leste, Gabriel Fonsiano Souza hato’o agradesimentu ba PNTL ne’ebé tulun ona sira iha ámbitu aniversáriu PNTL iha periodu ida ne’e.
Hodi dehan, AHDMTL nia harii iha 11 liu ba kotuk ho papel AHDMTL nudar organizasaun ida atu akumula ema ho difisiénsia, maibé sempre hasoru dezafiu iha komunidade nia leet, tan ne’e husu seguransa atu matan mos ba ema ho defisiénsia sira iha kualkér movimentasaun.
“Ha’u hakarak lori organizasaun Ema ho Defisiénsia no maluk difisiénsia nia naran simu komitmentu Komisáriu PNTL nian ba dala uluk mai vizita ami nia fatin oinsá bele buka hatene lolos ema ho defisiénsia sira nia preokupasaun, organizasaun ida ne’e halo protesaun no promosaun ba ema ho defisiénsia, agradese tanba bele proteje Ema ho Defisiénsia sira, husu atu apoiu másimu husi seguransa sira oinsá atu proteje ema ho defisiénsia sira tanba violasaun maka’as liu iha sosiedade asaun fíziku hasoru ema ho defisiénsia no halo violasaun hasoru ema ho difisiente iha komunidade sira,” Gabriel salienta.
Nia dehan, organizasaun nia forsa la too hasoru bainhira mosu agresaun fíziku hasoru ema ho defisiénsia iha sosidade, maibé organizasaun nia forsa mak oinsá akumula sira atu fo kapasitasaun tuir defisiensia sira nia direitu bainhira violasaun ho agresaun fíziku ba ema ho defisiensia, organizasaun defisiénsia labele halo buat ida, maibé polísia mak bele iha kompeténsia hodi tau matan no asegura ema ho defisiénsia iha Timor Leste.
Aniversáriu Polísia Nasional Timor Leste, sei realiza iha loron 27 fulan Marsu 2024, sei hala’o programa desportu hodi festeza loron importante ne’e, no hala’o mos atividade asaun karidade ba komunidade vulnerável no ema ho defisiénsia sira iha rai laran.
Jornalista : Arnaldo Nunes
Editór : Agapito de Deus
