Lafaek News—Sekretariu Estado Formasaun Profissional no Emprego (SEFOPE) haruka tan traballadór nain 60 kompostu mane 49 no feto 11 ba servisu iha Austrália.
Iha serimonia asina deklarasaun ne’e, SEFOPE liu husi Diresaun Nasional Empregu Externa (DNEE), João Correia fo sai katak Timor-oan nain 60 ne’e, ema nain 36 hanesan traballadór foun, no traballadór sira ne’ebé servisu ona iha Austrália hamutuk ema nain 24 (reinti), emprezáriu sira prepara ona hein simu sira nain 60 ne’e.
“Bainhira Ita nia traballadór sira servisu iha rai-liur ita sempre halo assina deklarasaun ámbitu sira hanesan ne’e, iha hamutuk ida ne’e ita atu husik hela joven sira hamutuk 60, maibé husi nain 60 ne’e mai iha tinan 2024 ne’e ema hamutuk ona 557 mak Ita husik ona ba Austrália husi Janeiru too agora mane 437 no feto 140 no renti sira ne’ebé ba ona mai fali foun mos númeru sa’e bei-beik ona, Ita espera tinan ida ne’e Ita fo oportunidade barak ba ita nia joven sira bele hadia netik no bele hetan servisu iha rai-liur,” DNEE João Correia afirma.
Iha fatin hanesan, Diretor Jerál SEFOPE husu ba traballadór sira ba servisu iha Australia tenke hatudu ezemplu di’ak.
“Ita boot sira ne’ebé bolu fali ne’e signifika Ita boot sira atitude komportamentu di’ak ho kompañia ho Ita boot sira nia patraun Ita boot sira nia patraun gosta Ita boot sira nia servisu, tan ne’e mak bolu fila-fila Ita boot sira atu ba oportunidade daruak, servisu iha sira nia kompañia ne’ebé Ita boot sira ne’ebé iha esperénsia labele influénsia fali kolega sira atu koko halai ses husi sistema, tanba iha ona esperensia hatene ona ema nia lian koñese malu influénsia fali kolega sira halai ses husi sistema atu servisu livre ba hetan osan boot, labele koko atu ses husi sistema se númor barak ses husi sistema bele afeta ba programa ida ne’e iha future, tanba ilegél barak liu iha Austália ne’ebé Ita boot sira reprezenta Timor Leste ba Austrália la reprezenta grupo ka artemarsiál,” Diretór Jerál SEFOPE, Carlito Rosario akresenta.
Jornalista : Arnaldo Nunes
Editór : Agapito de Deus
