Lafaek News—Relasiona ho udan iha loron kuarta (07/02/2024), bee sulin husi foho lolon lori lixu nakonu iha valeta hirak iha Dili laran no tahu nurak nakfilak ba rai-rahun suar ihaestrada diresaun Manleuana, Baileste no Balide.
Komunidade Manleuana Leandro Martins sujere bainhira udan para ona ekipa bombeirus tenke fase kedan tahu dodok ne’ebé sulin husi rai lolon atu labele hamosu fali rai-rahun hodi fo impaktu ba labarik kiik sira nia saúde liu-liu bele prevene moras ba komunidade sira.
“Ha’u husu bai ta nia governu liu-liu ekipa bombeirus bainhira udan para tenke mobiliza malu fase kedan rai dodok ne’ebé nakonu iha estrada laran atu labele hamosu rai-rahun, atu labele fo impaktu ba labarik kiik oan sira ho ferik katuas sira nia saúde,” Liandro ba Lafaek news iha Manleuana, kinta (08/02/2024).
Nia dehan, ekipa bombeirus tenke halo vizilánsia bainhira udan tau makas iha Dili laran, buka meius supa sai bee ne’ebé nakonu iha estrada laran, fase tutuir tahu dodok, nune’e sidade Dili ne’e mos, tanba Dili ne’e kapital Timor Leste nian, sidade ne’ebé mos labele sabraut hela de’it hanesan ne’e.
Iha sorin seluk, komunidade suku Kaikoli, José Mendonça, husu autoridade munisípiu Dili tenke jere kapitál Dili ne’e sai hanesan sidade reprezetativu Timor Leste ba mundu, orienta ekipa saneamentu tenke ativa iha momentu udan tau maka’as iha Dili laran, hili kedan lixu hirak iha valeta nune’e labele hamosu intupidu bee nalihun iha estrada laran hanesan debu.
“Ha’u fo hanoin ba autoridade munisipiu Dili orienta ekipa sanemanetu se bele iha tempu udan, kontrola kedan lixu iha valeta laran atu nune’e labele hamosu bee nalihun tama komunidade sira nia uma, dadeer-dader halo limpeza iha Dili laran, ita haree hanesan fali labarik mak halimar, rai rahun sura kintu kantu, mas boot sira kala la sente an, ha’u mak boot hanesan sira ha’u moe kuandu ha’u nia sidade hanesan los fahi knuuk,” Jose akresenta.
Observasaun Lafaek news nota iha sidade Dili parte Manleuana rai rahun sa’e maka’as husi rai ne’ebe bee lori tuun husi rai lolon nakonu iha estrada laran hodi fo impaktu ba estudante eskola Canossa, Saun Carlos eskola Manleuana.
Ekipa Kobertura : Lafaek News
Editor : Agapito de Deus
