Lafaek News–(Dili, 14 Dezembru 2023) – Centro Nacional Chega!I.P hakarak kongratula saudozu Sisto dos Santos no familia relasiona ho atribuisaun Prémiu Direitus Umanus (DU) “Sergio Viera de Mello” ho kategoria Direitus Sivis no Polítikus ne’ebé simu husi Prezidente Repúblika Demokátika Timor-Leste, José Ramos Horta.
Prémiu ne’e atribui bazeia ba dekretu Prezidente Repúblika nian ho númeru, 124/2023. Prémiu ne’e simu husi Saudozu nia kaben, Sra. Anita Cardoso, iha Palasiu Prezidensiál, Aitarak Lara, Dili.
Objetivu prinsipál husi atribuisaun Prémiu Direitus Umanus ba Saudozu Sisto dos Santos mak atu rekoñese nia kontribuisaun servisu ba promosaun no divulgasaun direitus umanus liu-liu Direitus Sivis no Polítikus iha Timor-Leste.
Tinan ne’e (2023), Prezidente Repúblika atribui Prémiu Direitus Umanus ba sidadaun Timoroan no estranjeiru, relevansia ba loron 10 Dezembru 2023 nu’udar loron internasional ba direitus umanus tuir deklarasaun universál direitus umanus husi Asembleia Jerál Organizasaun Nasoes Unidas nian.
Tinan-tinan Prezidente Repúblika sempre atribui Prémiu Direitus Umanus (DU) “Sergio Viera de Mello” ba sidadaun Timoroan no estranjeiru husi organizasaun governamentál no naun governamentál sira mak durante ne’e halo promosaun, defeza no divulgasaun Direitus Umanus iha Timor-Leste.
Saudozu Sisto dos Santos antes ne’e hanesan Diretór Asosiasaun HAK no Membru Konsellu Administrasaun Chega Nacional Chega!I.P ne’ebé hakotu is iha HNGV Dili iha loron 17 Marsu 2023.
