Lafaek News—Deputadu bankada KHUNTO, Luis Roberto husu ba IX governu hare’e preokupasaun funsionáriu kontratadus sira ne’ebé sei remata sira nia kontratu ba tinan ikus iha fulan dezembru 2023.
“Públiku kestiona kona-ba funsionáriu kontratadu sira iha Ministériu Saúde ne’ebé maka iha tinan ikus fulan Dezembru sei remata sira nia kontratu hanesan funsionáriu,” hateten deputadu KHUNTO Luis Roberto iha intervensaun ba debate Orsamentu Jerál Estadu (OJE) tinan 2024, Sesta (16/12/2023) .
Luis konfirma, tanbá atendimentu ba iha saúde públika ne’e presiza rekursu umanus barak, karik sira nia kontratu remata iha tinan ida ne’e planu governu nian ba oin atu prolonga ou halo sira sai permanente, atu nune’e bele atende komunidade sira ho di’ak no másimu.
“Atendimentu ba iha saúde públika ne’e presiza rekursu umanus barak, karik sira nia kontratu remata iha tinan ida ne’e planu governu nian ba oin atu prolonga ou halo sira sai permanente, atu nune’e bele atende ita nia komunidade sira ho di’ak no másimu. Karik hasai tiha sira, atendimentu ba públiku mós sei la másimu, satan ema sira ne’ebé serbisu iha instituisaun sira ne’e mós kleur no iha koñesementu kle’an ona,” dehan Luís.
Iha tempu hanesan bankada parlamentár Partidu Demokrátiku (PD) Armando dos Santos Lopes haktuir katak hafoin halo fiskalizasaun iha terrenu nota katak tebes duni professores sira ho títulu hanesan Inisia Eskola, Professores hanorin kleur la sai professores maibé sira ne’ebé halo kontratu foun sira maka sai fali professor/a.
“Prosesu selesaun ba rekrutamentu ne’e rasik la justu tanbá professor sira ne’ebé hanorin kleur no Inisia eskola sira la sai professor permanente maibé sira ne’ebé foin halo selesaun ne’ebé mós la liu husi administrasaun munisipal maibé husi Ministeriu maka tun ba iha baze hodi hala’o kna’ar,” katak nia.
Iha fatin hanesan Governu liu husi Ministériu Saúde (MS) hatan ba kestaun hirak ne’e katak iha MS iha funsionáriu kontratu kazual lubun ida ne’ebé mak sira nia kontratu termu sertu ne’e rasik iha nia klauzula hateten katak kaundu antes fulan ida atu termina kontratu sei iha notifikasaun.
“Normalmente parte saúde, liuhusi diresaun jerál l servisu Kooperativa halo notifikasaun atu kontinua ou lae, bazeia ba iha avaliasaun servisu ne’ebé mak durante ne’e hala’o,” haktuir Ministra Saúde Elia dos Reis Amaral.
Governante ne’e salienta liután katak oras ne’e dadaun mós Ministeriu Saúde liu husi Palacio das Cinzas loke vaga nune’e sira nafatin enkoraja hirak ne’ebé maka kontratu atu remata tinan ne’e iha fim do Ano bele konkore iha vaga refere ho kriteria hirak ne’ebé maka Palacio das Cinzas presiza.
Entretantu Parlamentu Nasionál aprova ona Orsamentu ba Ministeriu Saúde ho votus A favor 44, Kontra 2 no abstensaun 19 ho montante Orsamentu Millaun $67.600.906 ho kategoria
Salariu e Vensimentu: $36.706.970, Bens e servisu: $13.426.403, Transferensia publika: $ 12.590.400, Capital Menór: $2.977.133, Kapitál dezenvolvimentu: $1.900.000.
Jornalista : André da Costa
Editór : Paulo Collo