Lafaek News-Prezidente Repúblika (PR) José Manuel Ramos-Horta fó posse ba kna’ar Embaixadór na’in 6 mak hanesan, Dionísio Babo Embaixadór TL ba Nasoens Unidas, Embaixadór TL ba Indonézia António da Conceição “Kalohan”, Embaixadora TL ba Brazil Maria Ãngela Guterres Viegas Carascalão, Embaixadora TL ba Vaticano Chloé Dindo, Embaixadór TL ba Repúblika Singapura Alexandre Vital da Cruz Araújo Tilman no Embaixadór TL ba Repúblika Laos, Filomeno Aleixo da Cruz.
Xefe estadu José Manuel Ramos Horta konsidera nasaun hirak ne’ebé TL ninia embaixada designa ba ne’e importante tebes, maske nasaun balun seida’uk iha, Tersa (12/12/2023).
Xefe Estadu ne’e hatutan, Embaixadór Timor-Leste nian iha rai li’ur ne’e reprezenta xefe estadu, reprezenta estadu, governu no nasaun tanbá ne’e husu ba Embaixadór ho funsionáriu sira tenke hatudu seriedade ho dedikasaun hodi hala’o relasaun ho nasaun ne’ebé Timor-Leste nia Embaixada koloka ba.
“Embaixadór sira tenke koloka prioridade Timor-Leste nian atu hala’o relasaun multilaterais no bilateráis nomós hatudu prestasaun servisu ho di’ak hodi fó susesu ba TL,” Katak xefe Estadu Horta.
Iha sorin seluk Visé-Ministra Asuntu ASEAN, Milena Maria da Costa Rangel haktuir, Embaixadór foun na’in neen ne’e atu troka Embaixadór na’in neen seluk ne’ebé sira nia misaun termina ona.
“Ohin Prezidente Repúblika Ramos Manuel Horta fó tomada de pose ba embaixadór TL na’in neen ba misaun permanente misaun Nasoens Unidas, Repúblika Indonézia, Brazil, Vaticano, Repúblika Singapura, no Laos, sira atu fila tanbá sira nia tempu to’o ona atu fila-fali mai TL, tanbá ne’e mak nomeia fali embaixadór para ba priense fali vaga xefe misaun embaixadór sira nian iha nasaun sira ne’e,” informa Milena.
Nia dehan mandatu normal ba embaixadór sira ne’e to’o tinan tolu, maibé depende nesesidade, kuandu halo extensaun entaun halo extensaun, Posse ba embaixadór ne’e, bazeia ba kompeténsia xefe estadu nian ne’ebé hatu’ur ona iha K-RDTL artigu 87, aliñea B katak, Prezidente Repúblika iha kompeténsia, iha relasaun internasionál atu nomeia no ezonera embaixadór, reprezentante permanente no enviadu extraordináriu tuir governu nia proposta.
Jornalista : Epifania I. Pinto
Editór : Paulo Collo
