Lafaek News-Governu Japaun ofisialmente apoiu fundu orsamentu hamutuk millaun $5.9 ba governu Timor Leste liuhusi Sekretáriu Estadu Komunikasaun Sosiál (SEKOMS), atu hari’i edifísiu sentrál Rádiu Televizaun Timor Leste, Empreza Públika (RTTL,E.P) iha tinan oin.
“Governu Japaun liuhusi Embaixada iha Timor-Leste, aprejenta breafing mai Governu Timor-Leste no ba mós UNDP ne’ebé hanesan ezekutór bá konstrusaun edifisiu refere, atu haré oinsá balansu bá Orsamentu husi millaun $5.9 ne’e ba nia utilizasaun bá edifisiu sentrál ida ne’e, portantu millaun $4.4 ba konstrusaun no seluk ne’e iha ba hanesan Administrasaun, treinamentu ba jornalista sira RTTL.E.P. nian,” hateten SEKOMS Expedito ba jornalista sira hafoin partisipa reuniaun ne’ebé hala’o husi RTTL,E.P ho UNDP iha Salaun Kofi Annan Kaikoli, kuarta, 06/12/2023.
Enkuantu partisipasaun direta husi Sekretáriu Estadu Expedito Dias iha reuniaun ne’e, oinsá atu hare’e no rona direta aprezentasaun kona-ba projetu konstrusaun edifisiu foun RTTL,E.P ne’ebé mak aprejenta husi Embaixadór Japaun. Nune’e projetu kontruksaun ne’e rasik sei realiza iha tinan 2024 n o tuir planu sei finaliza iha tinan 2026.
Expedito konsidera projetu konstruksaun ne’e pozitivu tebes tamba bele reforsa di’ak liután servisu no kna’ar iha RTTL,E.P, maibé importante mós tenke halo estudu viabilidade nune’e bele garante kualidade iha future.
“Durasaun konstrusaun bá tinan rua tamba ne’e, presiza halo edifísiu ida ne’ebé maka kualidade no tenke liumós husi estudu viabilidade ne’ebé mak di’ak, tamba kaikoli ne’e rai ida ne’ebé mak be’e barak iha okos. Entaun sira mós tenke halo estudu viabilidade ne’ebé klean no estudu ne’e la’o dadaun ona husi kompaña ida husi Japaun,” Expedito hatutan.
Iha tempu hanesan Embaixadór Japaun husu ba UNDP ne’ebé hanesan ezekutór bá konstrusaun refere atu hili empreza ne’ebé kualidade ho sentidu katak, empreza ida ne’ebé atu halo konstrusaun ne’e la’ós bá atu buka lukru maibé, oinsá atu halo edifisiu ida ne’e ho kualidade. No iha tempu badak sei loke konkursu públiku ka prosesu tenderizasaun ba empreza hotu inklui internasionál.
“SEKOMS mós sei koloka Pessoál enjeneiru atu bele halo servisu hamutuk ho enjeneiru husi kompaña bá projetu nian nomós ho UNDP ninian, atu nune’e garantia kualidade konstrusaun ba edifisiu ne’e rasik,” tenik Nia.
Iha aprezentasaun bá konstrusaun ne’e mós sei halo auditóriu ida ne’ebé bo’ot ho kapasidade ne’ebé bele akumula ema rihun ida (1.000), lakleur tán Timor-Leste adere ba ASEAN konserteza atividade barak mak ASEAN sei realiza, tamba RTTL,E.P. hanesan Televizaun Públiku no Estadu nian, sei akumula atividade barak iha auditorium ne’e no bele hetan transmisaun Direta husi RTTL, E.P.
“Konstrusaun ba edifisiu refere akumula andar tolu(3), iha klaran Auditorium, leten liu sala refreshing ba jornalista sira no Presidente RTTL,E.P. mós aprejenta sei instala estudiu haat (4) iha edifisiu refere hanesan: Prodúz no transmite lian tetun, Portugés, Inglés no Indonézia,” Governante ne’e akresenta liu tan.
Iha fatin hanesan Embaixadór Japaun iha Timor-Leste Tetsuya Kimura hatutan katak, Japaun servisu hamutuk ho UNDP atu promove prosesu Demokrátika Timor-Leste nian. No ida ne’e importante no prioridade tebes bá korporasaun dezenvolvimentu Japaun nian. Atinji ona objetivu ida-ne’e importante tebes atu apoia fatin ne’e liuliu iha transmisaun nasionál sira.
“Projetu ida-ne’e inklui postu konstrusaun ba estudiu foun sira maibé mós parte formasaun nian. No ita mós oferese Treinamentu importante ba funsionáriu sira husi RTTL,E.P. no jornalista sira seluk,”haktuir Embaixadór.
Entretanto iha reuniaun ne’e partisipa husi SEKOMS Expedito Dias Ximenes, Embaixador Japaun iha Timor-Leste Señór Tetsuya KIMURA, UNDP, no Presidente RTTL,E.P. José Belo Taraleu.
Estajiáriu : André da Costa
Editór : Marcos da Silva Araujo.
