Lafaek News-Kandidatura xefi suku Kamea postu administrativu Cristu-Rei, Munisípiu Díli, Kuarta (04/10 /2023), iha ne’ebé hakarak kandidataan ba xefe suku períodu ida ne’e hodi serví komunidade ho direitu ne’ebé hanesan no transmite ba moris di’ak nu’udar na’in ba Kamea oan.
Kandidatura xefe suku Kamea, Jenito Jordão Soares “Nobay” ba Lafaek News katak, Hakarak kandidataan ba xefe suku iha períodu tinan lima ida ne’e mai hodi serví komunidade la’os komunidade mak atu serví fali xefu suku.
“Ha’u hakarak kandidataan ba xefe suku Kamea ho razaun fundamentu ida katak ha’u atu ba serví komunidade la’ós komunidade mak atu serví fali i ha’u, nune’e mos ho situasaun no kondisaun iha suku ne’e laran maka dezafia hau atu kompete hodi lori mudansa ba suku Kamea ne’e rasik,” Nobay dehan.
Nia hatutan, Karik hetan konfiansa husi komunidade sei utiliza fiar ne’e ho responsabilidade hodi transmite suku Kamea sai suku ida ne’ebé mak bele akumula inan aman, veteranu no joven hotu-hotu sai na’in ba suku Kamea, signifika sidadaun hotu-hotu mai ho direitu ne’ebé hanesan la hare’e ba kór no rasa.
Kandidatura ne’e mai ho programa prinsipal 8 mak hanesan tuir mai ne’e, administrasaun suku tenke ho transparensia, desporto, hakbesik saúde ba komunidade, infraestrutura báziku liu-liu bee mos, formasaun non formal, idozus ba inan aman sira, kria koperativa entre inan aman agrikultór sira, prepara armazein ba inan aman agrikultór sira.
“Ha’u nia karákter ba ema hotu no komunidade ne’e hanesan ema simples no sempre halo belun ho ema hotu, tanba ne’e ha’u sei nafatin implementa karákter ne’e bainhra fo fiar mai ha’u, iha atendimentu 24 oras bainhra komunidade presiza, la presiza tenke iha oras servisu, ha’u ema ne’ebé flexível, anti rasa no anti korupsaun nomós anti familiarizmu, tan ne’e ha’u prontu rona ideias ka sujestaun husi ema seluk,” katak nia.
Kandidatura ne’e nia parte garante katak komunidade Kamea sei fo konfiansa tomak ba nia hodi lidera no serví komunidade refere, tanba mai hamri’ik ho independente hanesan Joven ida ne’ebé hakarak kontribui ba rai ida ne’e liu-liu ba suku ne’e rasik.
Jornalista : Ekipa Lafaek News
Editor. : Paulo Collo
