Lafaek News—Nakait ho udan-anin husi fulan Janeiru no fevereiru tinan ne’e hamosu rai-nakfera iha aldeia Tuluata, suku Bobonaro, postu administrativu Bobonaro munisípiu Bobonaro.
Rai-nakfera mosu iha loron 28, dadeer madrugada halo rai okos book an nune’e doko rai leten nakfera borus uma-kain 9 ameasadu.
“Rai nakfera ne’e iha loron tersa 28/02/2023 madrugada ne’e, ami hader mai haree rai nakfera tiha ona, tuku ualu dader ne’e aumenta nakfera to’o didin lolon sira, ami halai mai kedas familia sira iha bairu sorin mai”, hateten ho laran triste komunidade afetadu Costantino Maia via Telemóvel ba Lafaek News, foin lalais.
Uma kain 9 ne’ebé ameasadu, nakfera husi didin lolon no semente leten daet mos uma seluk ne’ebé besik malu, halo komunidade sira sente tauk no la hakmatek iha tempu kalan.
“Ami ta’uk no no trauma tanba uma ne’ebé ami hela ba ne’e nakfera hotu husi rai to’o uma loloon sira, ha’u nia uma nakfera iha parte laran ne’e kuaze hotu kedas, no didin loloon sira, ami halai sai ne’e tauk kalan ami toba mak rai monu ka oinsa, ita lahatene tanba dezastre ne’e, loron ita bele halai kalan ne’e halai oinsa”.
Iha parte seluk xefi Aldeia Tuluata Vidal Henriques deklara nu’udar autoridade lokal, identifika hotu ona uma kain 9 ne’e, agora dadaun informa ona ba Xefi Suku no hato’o ona ba pontu fokal dezastre munisípiu Bobonaro.
“Nu’udar autoridade lokal loron ne’e ha’u rona akontese ha’u tun kedas iha fatin akontesimentu, identifika hotu ona uma hirak ne’e i agora dadaun informa ona ba Xefe do suku no xefi suku informa ona ba fokál poin dezastre Munisípiu”, katak Xefi Aldeia Tuluata Vidal Henriques via telemóvel.
Vidal afirma, hanesan autoridade lokal haree akontesimentu hirak ne’e triste teb-tebes, uma 9 mak afetadu ameasadu tebes.
Enkuantu udan no anin bo’ot makas ne’e ne’e hahú iha kedas loron 24 to’o agora, dadaun ne’e komunidade sira la hela iha uma refere tanba fó ameasadu tebes ba sira nia moris.
Jornalista : Rita Moniz
Editor : Agapito de Deus
