Lafaek News—Deskonfia liña eletrisidade mak sirkuit rezulta ahi han motuk uma lisan Lekuru Lorasa iha aldeia Jefalu suku Afabubo postu Luro munisípiu Lautém.
Uma nain Manuel Miranda haktuir ba lafaek news katak, iha loron 25/02, dadeer hader husi toba fatin ba liu toos-laran distánsia dook husi uma lisan ne’e, bainhira fila-fali mai haree hakfodak tanba ahi lakan sa’e as ba loron-matan no han mos duut iha uma kakuluk no didin.
“Akontesimentu ne’e iha tuku 03 lokraik ha’u laiha fatin ida ne’e, akontese deskonfia husi liña eletrisidade mak konslet ne’e duni nia impaktu ahi bele han uma,” katak Manuel Miranda iha Afabubo.
Tuir nia, iha inséndiu ne’e, sasan uma-laran tomak inklui motor ida labele salva no buat hotu-botu ahi han motuk.
“Ami la konsege hasai kuase ahi han too total, ohin laiha ema ida mak hein iha ne’e, tamba oin bainaka ida mai iha sorin sira ba hotu sorin ne’e mak sasan ne’e ami labele salva tanba motor de’it iha rai ami labele hasai sa tan sasan kiikoan,” Hatete Manuel.
Manuel konfirma katak nia parte seidauk hatoo akontesimentu ne’e ba autoridade liu-liu adiministrador postu administrativu Luro hodi relata dadus ba governu liu husi Sekretaria Estadu Arte no Kultura hodi hetan tulun fila-fali.
“Ahi han hotu uma lisan Lekuru Lorasa tempu tuir mai iha kbiit hodi harii fila fali, ha’u hanesan hein uma tradisional ida ne’e, ami ne’ebé hetan dezastre ne’e husu ba governu ajuda netik ba ami familia ne’ebe vítima ba inséndiu, ami la husu buat ne’ebe boot, maibé ami husu tuir kbiit governu nian tanba inséndiu ne’e akontese sasán iha uma laran hanesan lulik, sasan tais foos, hau nia avo mate sasan sira ne’e ami tau hotu iha laran kuase ahi han total,”Nia haktuir.
Entretantu, too notisia ne’e hatun, lafaek news seidauk halo konfirmasaun ho parte governu liu-liu Sekretariu Estadu Arte no Kultura (SEAK).
Jornalista : Arnaldo Nunes
Editor : Agapito de Deus
