Lafaek News—Juventude ne’ebé hamahan-an iha Asosiasaun Juventude Estudantil Suku Baduro (AJESB), ho inisiativa rasik rehabilita Eskola Pre-Eskolar Baduro no entrega kedan ba autoridade lokál no Professór sira.
Reprezentante inan-aman husi estudante, Zil Correia, orgulhu ba juventude sira bele kolabora malu, hodi hadia Pre-Eskolár refere no konsidera hanesan ezemplu ida.
“Ita nia juventude ho esforsu tomak AJESB sira rehabilita Pre-Eskola, ohin sira remata , ita orguillu agradese. uluk ita nia oan sira tu’ur deit iha rai, maibe ohin loron sira bele tu’ur ona kadeira no eskola ne bele pinta hikas liu husi inisiativa AJSB nu’udár maun ba nia alin sira, ami inan aman apresia tebes, ” Dehan ho Orgullu Zil Correia ba jornalista sira iha suku Baduro postu administrativu Lautém, 02/01/2023.
Iha okaziasaun ne’e, Zil Correia expressa mos nia lamentasaun balun tambá iha serimónia entrega la iha autoriedade Suku ne’ebé marka prezensa hodi agradese servisu juventude AJSB.
Iha fatin hanesan, Veteranu Tomas Pires “Upuratu”, husu ba inan aman no profesores sira kuidadu Pre-Eskolar ne’e no hanorin ita nia oan sira ho diak, tanba sira maka futuru ba nasaun nian
“Ba Inan-Aman sira kuidadu eskola ida ne’e halo didiak, eskola Pre-Eskolár ida ba futuru ita nia oan sira nian, husu mos ba mestre sira hanorin didiak ita nia oan sira, ita dehan futuru nasaun, sira ne’e maka futuru ba ita nia nasaun nian,” Tenik Veteranu Upuratu.
Veteranu ne’e hato mos nia preokupa no husu nafatin ba AJESB hodi esforsu hadia nafatin fasilidade balun ne’ebé maka sei falta, hanesan bee, haris fatin no hirak ne’ebé sei presiza halo kompletu
“Prezidente AJESB Olderico Soares haktuir “AJESB Mai ho nia prinsipiu progresu atu kontribui hodi dezenvolve Suku. Ami kontinua ho apoiu husi inan-aman sira no veteranu sira. Katak ho prinsipiu ne’ebé maka iha, atividade lubuk ida ami prontu hala’o maibe ita haree mos ba ita nia fundus, nune’e agradese no apresia ba laran luak kompañia sira ne’ebé apoiu ita ho fundus ba rehabilita Pre-eskolar ida ne’e hamutuk, $850.00 inklui fundus AJESB nian ne’ebé antes ne iha ona, ” Subliña Olderico.
Materiál sira ne’ebé AJESB utiliza hodi rehabilita no oferese ba Pre-Eskola ida ne’e maka hanesan, Kadera 30, Meza 15, Rede Janela 21, Tinta 2, Pregu 5-7 mill 20 Kg, Roller no simenti, AJESB hetan Apoiu fundus husi telekomunikaaun Timor Telecom (TT) ho osan montante $630.00, no Kompanhia BTK, $100.00.
Rehabilitasaun ne’e hala’o durante semana rua ba eskola refere , ne’ebé lokaliza iha Suku Baduro, Postu-Administrativu Lautém, Munisípiu Lautém.
Entertantu, Pré-Eskolár Baduro re-inisia iha tinan 2020 no estudante hamutuk 38, hanorin husi Professór no Professora voluntáriu hamutuk nain 4.
Kontributor : Armenio Joker
Editor : Agapito de Deus
