Lafaek news—Prezidente Komisaun Organizador verifikasaun veteranu postu administrativu Iliomar, munisípiu Lautém José Luis da Costa, informa kandidatus veteranus Iliomar hamutuk 2000 sei submete ba prosesu juramentu ba rai lulik no erois hotu.
“Objetivu ba eventu ida ne’e tanba foin dadauk verifikasaun la’o tiha ona ita nia maluk sira ne’ebe sai hanesan kandidatu ba veteranus sei jura ho rai lulik ran ho isin no ba matebian sira ne’ebe maka durante mate tamba ida ne’e inisiativa husi ita nia maluk sira kandidatu ba veteranus fo hanoin hamutuk fo konfiansa mai ha’u lidera eventu ida ne’e,” katak José Luis ba lafaek news iha postu administrative Iliomar foin lalais ne’e.
Tanba durante tinan naruk nia laran frente klandestina idak-idak la’o ninian ho ida ne’e iha inisiativa hodi bolu malu hamutuk harii amizade unidade sai metin liután liu husi organiza eventu verifikasaun dadus veteranu ne’e.
“Ita nia frente klandestina idak idak la’o ninian no idak idak ses an ba nia responsavel kaixa, ida ne’e maka ami hamutuk atu bolu malu oinsa maka ita nia unidade ita nia hamutuk ita nia amijade forte liu tan metin liutan burasa liu tan, tan ne’e maka ohin hamutuk ohin halo eventu ida ne’e”.
Jose Luis da Costa, relata kandidatus veteranus tinan ida ne’e hamutuk 2000, nunka koñese malu maibé oras to’o ona atu buka malu hodi unidade forte no metin liután,
“Kandidatus veteransu ba tinan ida ne’e rihun rua resin ho nune’e ami hamutuk fila fali uluk frente kalandestina lao iha iliomar ita nunka konese malu nunka hatene malu maibé ohin to’o ona tempu oras to’o ona ita buka malu atu nune’e ita nia unidade forte liu tan no metin iha future,” José sublina.
Total orsamentu ne’ebé gasta ba eventu verifikasaun dadus veteranus kompostu husi frente klandistina ho frente armada gastus osan total $2500, osan hirak ne’e husi kontribuisaun rasik la’os fo husi governu no entidades seluk.
Observasaun lafaek news iha terenu nota, eventu refere hetan kontribuisaun másimu husi komunidade sira, responsável kaixa klandistina, inan-aman no joven frente klandistina ho veteran sira iha postu Iliomar.
Jornalista : Alsino da Costa Madeira
Editor : Agapito de Deus
