Loron 22/12/2022, Domingos Maia.

Doben Família sira hotu:

Tinan-tinan, hafoin selebra tiha Natal, tuir Liturgia Kreda Katólika, selebra tuir kedas Festa Sagrada Família nian molok remata fulan dezembru.

Maibé pwrgunta mak nia sentidu loloos hosi aspetu sosiál no espirituál nian ida nebé loos atu família- sarani sira hotu bele haktuir iha meiu ambiente moris-familiar lorloron nian, konsente atu tau-matan ou família-sarani sira-nia hanoin mak preokupa liu ho festa rame Natal komersiál nian?

Moris-foun ho nia sentidu sosiál no espirituál hahú haburas uluk hosi Sagrada Família Nazaré.

1. Uluk nana’in, buka hatene lai tanbasá mak Família ne’e temi Sagrada (lulik)?

Katak família Jesus, Maria no José, sira-nia moris- hamutuk, iha Nazaré tempu nebá, nakunu ho grasa no bensaun wa’in Maromak Espírito Santu nian. Sagrada ka Lulik tanbá fiar katak família nebé moris simples no haraik-an mak dada Maromak tau-matan no horik duni ho sira.

2. Sagrada Família mak Família Místika ida. Ne’e reflexaun pesoál. Tanbasá sai nune’e? Mai ita fihir:
3. a) Atu dehan, katak Família Nazaré ne’e família-umana ida, lae. Basá José ne’e aman adotivu; nia relasaun ho Maria tuananga de’it; molok tuur-ahi no hafoin, Maria Virgem nafatin, la iha relasaun ho mane ida nu’udar feen-laen.
4. b) Atu dehan, katak família ne’e divina de’it mós lae. Basá Maria feto-raan virgem ida; maibé Jesus ne’e Maromak Oan.

Família ne’e Místika basá horik entre mundu no lalehan; haktuir no hatutan nafatin planu mistériozu- klean Maromak nian, nebé haree no la haree; hametin relasaun moris umana nian ho moris-divinu nian; kesi-metin tatalin moris espirituál no sosiál; liga aspetu vertikalismu no orizontalismu nian.

Tan ne’e hotu, mak ha’u temi Família Místika ida. Família Nazaré sai modelu sakramentál basá nu’udar meiu ida atu lori família sira hakbesik ba Maromak no sai mós nu’udar sinál prezensa reál ida hosi unidade domin Família Santíssima Trindade: Aman, Oan no Espírio Santo.

Nune’e mós Jesus sai modelo Isin ka Illas Aman Maromak nian, nebé bele lori ema ba haree Nia Aman Maksunik; no hatene katak Nia (Jesus) mak Na’i.

Maria Virgem sai modelu Inan ba inan sira hotu iha rai; no José sai modelu aman santu ida ho knaar protetor ba aman maknaar sira iha uma-kain.

Hosi aspetu ka dimensaun karuak: espiritualidade ka divindade vs umanidade ou sosialidade, vertikalidade vs horizontalidade nian mak marka diferensa entre Família Nazaré ho família bai-bain hodi hana’i nia Sacralidade (lulik) ne’e: Katak la’ós família bai-bain ida.

No família hotu-hotu bele soi grasa no biban ne’e atu hari’i no hafutar uma-kain laran ho espiritualidade familiar ida ne’e hodi hetan maksoin.

Pergunta nebé sei hatan tuir mai maka: Klibur família sarani sira, iha bairro ka sentru pastoral sira, nebé ho fiar no devosaun makaas hodi hamahon-an iha “Organizasaun Sagrada Família”, haktuir loloos duni ona espiritualidade  sagradu (lulik) Família ne’e nian? (Sei hatutan).