Lafaek News—Komunidade no juventude aldeia Makalado suku Daudere postu administrativu Lautém, munisípiu Lautém, ho inisitiva kontribui osan hamutuk harii sede aldeia hodi tulun atendimentu ba povu kiik iha remotas.
Xefe aldeia Makalodo, Alfaredo Pires haktuir intensaun harii sede ida ne’e atu sai mahon ba Komunidade Makalodo bainhira iha programa komunitáriu bele halibur komunidade kiik sira hodi hala’o reuniaun iha sede ne’e ninia laran.
“Objetivu ba komunidade makalodo atu harii sede aldeia ida nee,sede nee nuudar mahon ida ba komunidade aldeia makalodo nian atu nunee ba futuru iha inkontru ruma karik bele konvida malu hamutuk iha sede ida nee nuudar mahon ida hodi fo hanoin ida hodi lori desenvolvimentu ba oin,”katak autoridade local ne’e ba lafaek news foin lalais ne’e.
Alfredo katak, Juventude no komunidade aldeia Makalodo iha inisiativa rasik hodi konstrui sede ida ne’e la’os fasilidade husi governu.
“Maibé ne’e planu Juventude no inan aman nia hodi buka rasik material hanesan ai ii depois kalen nee harii eskola EBF no 1 Makalodo nia uluk ne’ebé la uja ona ami hamutuk halo planu juventude no inan aman harii sede ida nee,konaba fasilitasaun esforsu husi inan aman no juventude deit laos husi parte governu no parte estadu sivil la iha sede nee foin dadauk harii iha fulan setembro tinan ida nee nia laran,” Alfredo esplika.
Iha sorin seluk, reprezentante juventude aldeia Makalodo Virgílio Nunes, hatutan durante ne’e laiha fatin ida própriu atu hamahan komunidade sira bainhira hala’o reuniaun ruma interligadu ho kestsaun komunidade, tan ne’e harii sede ne’e atu sai fatin sentru ba komunidade aldeia makalodo.
Nuudar juventude hakarak kontribui ba aldeia ida ne’e la depende ba governu signifika atu kontribui ba aldeia buat ne’ebé hakarak halo depende desizaun husi juventude sira nian, primeiro juventude tenke unidade, Juventude tenke komprende malu, Juventude mos tenke hatene kona-ba situasaun aldeia rasik, tanba da-daun ne’e ami nia aldeia ida ne’e aldeia ida rurais,” katak Virgílio.
Hodi dehan, aldeia ne’e dook husi sidade, krize eletrisidade no estrada, hasusar populasaun sira atu lori netik sira nia riku produsaun lokál ba merkadu, halo kontribuisaun ba dezenvolvimentu labele hein de’it husi governu, maibé depende ba kbiit juventude no inan-aman harii rasik sede hodi sai sentru símbolu ba Juventude no inan-aman.
Jornalilsta : Arnaldo Nunes
Editor : Agapito de Deus
