Lafaek News—Estudante ida husi Eskola Sekundária Jerál Suai, ho naran Novita Rosa da Cruz, númeru ezame CL06815 siénsia teknolojia, labele partisipa iha Ezame Nasional (EN) ho razaun nia aman rasik mate.
“Iha ESGP Suai, estudante na’in ida la tuir ezame nasional no lokál tanba pas ezame nia aman rasik mate,” informa Diretór ESGP Suai, Franselino Freitas, ba Lafaek News iha nia nia k’nar fatin, kinta (27/10/2022).
liga kestaun ne’e, Franselino dehan, nia parte hatoo ona karta pedidu ba Minisériu Edukasaun nune’e bele partisipa iha ezame ronde daruak nian.
“Ami hato’o ona pedidu ba edukasaun atu nia tuir ezame segundu volta, no mos iha na’in ida mak moras, ami fo ezame ba nia iha uma de’it, sira seluk ne’e tuir hotu ezame iha sala de ezame,” katak director eskola ESGP Suai ne’e.
Ezame nasional no lokál tinan 2022, iha Eskola Sekundaria Jerál Públiku (ESGP) Suai, domina ho estudante feto hamutuk 350 no mane 273 total 624, kompostu husi siénsia teknolojia 317 no Siénsia Sosiais Umanitária ema nain 307.
Xefe Komisaun ba Ezame Nasional no Lokál iha ESGP Suai, Julio Cardoso Informa, afirma eskola prepara sala ezame hamutuk 32, ba estudante sira no kada sala iha estudante na’in 20.
“Ezame Nasional no Lokál ne’e, ami iha sala 32, no kada sala iha estudante hamutuk ema na’in 40 maibé fahe ba turma 2, entaun sala ida ema na’in 20 de’it mak uja hodi tuir ezame” Informa Xefe Komisaun ezame nasional no lokál Iha ESGP Suai, Julio Cardoso.
Ezame nasional no lokál estudante na’in ida hala’o nia ezame iha uma tanba kondisaun moras, dadus estudantes finalistas ESGP-Suai hamutuk ema na’in 624.
Observasaun jornalista nota iha prosesu ezame nasional ba estudante ESGP Suai hahú segunda 24 to’o ohin 27 Outubru 2022, la’o normal, no hetan observasaun husi Ekipa MEJD, Diresaun Nasional Ensino Sekundaria.
Jornalista : Chamot Nahac
Editór : Agapito de Deus
