Lafaek News—Estudantes Eskola Bazika Sentral (EBS) 11 de Marsu Postu Administrativu Maukatar, Munisipiu Kovalima, formaliza kadeira sai mejiña hodi partisipa iha ezame nasional 2022.
Estudante Arcansio Amaral, hateten situasaun ne’e afeta tebes estudantes sira nia konsentrasaun iha ezame nasional 2022, no husu governu atu tau investimentu osan ne’ebé boot ba setor edukasaun hodi garante kualidade edukasaun hahú husi ohin ba oin.
“Ami hasoru problema barak hanesan laiha kadeira no Meza, ami persija kadeira no Meza, ami tuir ezame hanesan ne’e, fallansa iha ne’eba karik saida mak mosu ba ami estudante sira? ne’e mak ami presiza kadeira no Meza ne’e,” karak estudante Arcansio Amaral.
Iha fatin hanesan, Deméncia Cardoso Amaral, nu’udar estudante finalist tinan ne’e iha EBS 11 de Marsu, sente triste tanba partispa iha ezame nasional ba tinan ne’e obrigadu tenki hakerek de’it iha kadeira leten hodi resposta pergunta iha ezame nasional ne’e.
“Ha’u nudar Estudante ida iha Eskola 11 de Marsu senti triste tebes tanba ami nia meza ho kadeira laiha, ami hakerek deit iha kadeira tanba desde uluk setimu Ano ami tama ami senti tristi, tanba ami tama ami buka kadeira lori tanis, ami senti la seguru tanba ami preinse sala karik ami ta’uk ba iha nasional ami la pasa.” katak Demencia Cardoso Perreira
Hatan ba preukupasaun ne’e, diretór EBS 11 de Marsu Mauqatar, Evaresto do Carmo, rekuñese estudante hamutuk ema na’in 55 senti la seguru tuir ezame nasional ba 2022, laiha fasilidade hanesan meza no kadeira hodi nesesita estudante sira partisipa iha ezame nasional.
“Ha’u senti triste tebes tanba sira hakerek mos tenki ser hakruk tanba meza ho kadeira laiha no balu oin halai monu tan, ne’ebe ha’u hanoin liu mak Estudante sira ne’e.” Katak Diretór EBS 11 de Marsu Evarestu do Carmo.
Diretór ne’e dehan alenda laiha kadeira ho Meza EBS 11 de Marsu mos laiha armáriu atu asegura livru manual sira, tan ne’e nia husu ba ministériu kompetente atu tau matan ba preokupasaun ne’ebé eskola ne’e hasoru da-daun.
“Ne’ebé ha’u husu ba estadu, bele tau matan ba kadeira no meza hirak ne’e, la’os ida ne’e deit maibé lemari sira ne’e hotu, livru hotu hotu tau iha rai de’it livru manual eskola nian tantu profesor nia livru ho Estudante ninian hotu.” tenik nia.
Diretór ne’e espresa ho laran triste katak Servisu Edukasaun Munisipal Kovalima lori ona kadeira ba EBS 11 de Marsu maibé, realidade kadeira ne’e seidauk to’o sira nia liman.
“Ha’u to’o iha ne’e, ha’u nia matan ben monu tanba hare kadeira ho meza laiha, ha’u ba to’o iha edukasaun sira dehan drop ona meza ho kadeira ne’e, mai to’o iha ne’e maibé realidade ha’u cek kadeira ho meza ne’ebé sira hatudu ne’e laiha.” informa nia
Estudante iha EBS 11 de Marsu hamotuk na’in 55, mane 18, feto 37, mak tuir ezame nasional, maske fasilidade hanesan kadeira no meza la sufiente ba sira maibé eskola realiza ezame nasional ba estudante sira la’o ho normal.
Jornalista : Moises Madeira
Editor : Chamot Nahac
