Lafaek News—Negosiante faan nuu laloir, Tito dos Santos Colo idade (22), husi Rejiaun Autonomia Oe-Cusse Nu’udar Joven ne’ebé faan nuu iha dalan ninin sustenta ba nia moris loro-loron.
Tito komenta, hanesan ema foin sa’e, sira ne’ebé buka matenek kontinua estuda, no sira ne’ebé la eskola labele soe tempu, no labele hakiduk ba kotuk, tanba sa’e foin sa’e sira sai fali adeptus iha dezenvolvimentu ekonomia iha rai-laran, ema seluk goza ita haketek de’it.
“Razaun ha’u hakarak faan nuu para hodi sustenta ba moris loro-loron no ajuda familia uma laran, nomós selu ba ami nia kos durante ami hela iha Dili, tan vida moris mak ami obriga aan tenki buka moris iha dalan ninin no tanba laiha kampu traballu, entaun ami tenki faan nuu”.Tenik Tito iha nia negosiante fatin jardin 5 de Maio, iha loron 27, Setembru
Entretantu Tito dos Santos Colo haktuir nuu folin depende ba ema sosa de’it, tempu di’ak ema sosa barak bele hetan rendimentu loron ida too $ 40, maibé tenke pasiénsia maka’as bainhira iha loron ida ema la sosa.
“Nuu ne’ebé ami faan nia folin depende ba ema hola, kadavez ema hola barak, kadavez ema ladun hola, no ema ne’ebé baibain hola barak liu mak hanesan ema funsionariu sira, nune’e kada loron ami bele hetan osan $30 too $40 dolar no nuu hirak ne’e ami borong husi langanan ho folin nuu fuan lima $2.00 dolar, Dehan Tito dos Santos Colo.
Tuir nia, osan ne’ebé hetan husi faan nuu ne’e mak utiliza ba nesesidade loro-loron, iha parte seluk tulun mos alin sira nia eskola iha Oe-kusse hodi sustenta familia sira nia moris loron-loron.
“Osan ne’ebé ami hetan husi faan nuu ne’e mak ha’u uzá ba nesesidade loro-loron, selu kos nomós ha’u haruka ba familia iha Oe-Cusse hodi sustenta uma laran nomós dalaruma ha’u hola de’it kafe masmidar fós hodi haruka ba familia”. Hatutan Tito dos Santos Colo
Negosiante Tito dos Santos Colo mós haktuir durante ne’e dalaruma kalan sira toba de’it iha fatin faan nuu nian, bainhira presiza atu troka ropa foin bele ba uma haris troka ropa mos hodi kontinua ba fatin fan hodi kontinua buka osan.
“Ikus liu husu Oe-kusse oan sira ne’ebé namkari iha Dili, labele influensia ho ema seluk, di’ak liu buka moris hodi haree familia sira iha foho Oe-kusse nian,” Tito hakotu.
Jornalista : Zita Menezes
Editor : Agapito de Deus
