Lafaek News-19-09-22, Administrasaun Munisípiu Kovalima servisu hamutuk Sentru Komunidade Kovalima kapasita funsionárius 42 kona-ba Utilizasaun Komputador ba programa Word, Excel, Power Point no internet báziku.
Administrador Munisípiu Kovalima, Francisco de Andrade hateten kapasitasaun kona-ba utizilisaun komputador ne’e fo ba funsionárius sira liu liu diretór no Xefe departamentu ne’ebé mak sei menus koñesimentu uja komputador.
“Ha’u observa Diretór no Xefe departamentu sira barak, iha ha’u nia oin sira kaer deit mak telemovel no balu ha’u haruka loke komputador mos sei labele, tanba ho hanoin ida ne’e mak ha’u husu ba malae sira atu apoiu, Ha’u agradese komunidade Autralianu tanba liu husi ha’u nia husu tulun ba sira kona-ba formasaun komputador ba ita nia funsionárius sira iha Kovalima oinsá bele simu desentralizasaun no ami nia rekursu umanu, mak saida tamba iha tempo ne’eba” Administrador Munisípiu Kovalima, Francisco de Andrade, hato’o lia ne’e iha salaun Sentru komunidade Kovalima, Segunda feira semana ne’e.
Tanba ne’e Administrador mos husu Funsionárius ne’ebé tuir formasaun ne’e ho seriedade hodi aprende di’ak liután bele kontribui ba prosesu dezenvolvimentu munisípiu Kovalima ba oin.
“Imi tenki iha seriedade atu aprende labele mai asal asal deit, tanba molok imi atu hetan sertifikadu ha’u haruka formador sira sei halo teste ba ita bo’ot sira iha ona koñesimentu mak foin fo sertifikadu, tanba servisu iha instituisaun la’os caza mizerecordia, tanba ne’e atu tane liman tenki fo mos buat ruma liu liu kapasitasaun ba funsionárius sira, ha’u lakoi funsionárius kazual sira halo operasaun makas liu funsionárius permanente” Nia Hatutan
Diretór Sentru Komunidade Kovalima, Alberto de Jesus Barros, fundamenta materia ne’ebé formador sira hanorin ba formandus sira, kona-ba ba programa internet báziku word, Excel, power point, formasaun durasaun semana ida sei hasoru malu durante oras hat nia naran.“Orariu kursu semana ida dala rua, kada loron oras rua, no kursu ne’e iha program tolu mak hanesan internet baziku, word,excel, power point, kursu durante fulan ida resin hahu husi fulan ida ne’e no sei remata iha Novembru, Kursu ida ne’e implementa husi belun ho Suai Kovalima, Grupo voluntariu ida husi Sidade phorpilips iha Australia no kursu durasaun fulan ida ho balun no remata depois antes atu hetan sertifikadu sira mos sei tuir teste, se mak iha mudansa nia mak sei hetan sertifikadu no ba sira ne’ebé mak la liu ami prontu kontinua hanorin sira maibe desizaun ba fali iha administrasaun Munisípiu” dehan Diretór Sentru Komunidade Kovalima Alberto de Jesus.
Observasaun RCCT funsionárius ne’ebé tuir formasaun komputador iha Sentru Komunidade Kovalima, mak Funsionárius permanete ne’ebé mak servisu iha Administrasaun Munispiu Kovalima nia okos.
Jornalista : Jhana Cardoso
Editor : Chamot Nahac
