Lafaek News–Primeiru Kardial Timor Leste Virgílio do Carmo da Silva, SDB, dehan kontinua koko esperiénsia maromak ninia domin no domin ida ne’ebé hatudu husi supresa ne’ebé maromak halo ba ninia povu Timor Leste.
Kardeal Virgílio do Carmo da Silva, SDB hatoo lian hirak ne’e iha omília misa agradesimentu Kardeal nian iha Tas-tolu Tersa (06/09/2022) katak kontinua koko esperiénsia maromak ninia domin no domin ida ne’ebé hatudu husi supresa ne’ebé maromak halo ba ninia povu.
“Ita kontinua koko esperiénsia Maromak ninia domin, domin ida ne’ebé mak hatudu husi supresa ne’ebé Maromak halo ba ninia povu, ida ne’e mak razaun ita halibur hamutuk iha ne’e”, esplika Primeiru Kardial Timor Leste Sua Eminência Virgílio Kardial do Carmo da Silva, SDB, Tersa (06/09/2022).
Kardeal dahuluk iha Timor Leste ne’e katak, bainhira maromak bolu, maromak fihir tau ninia liman ba ema ida iha sarani nia leet ne’e sinal katak Maromak hadomi nafatin povu ida ne’e, tau matan nafatin ba povu ida ne’e, la haluha povu ida ne’e.
“Tanba domin ida ne’e mak ohin, mai halibur hamutuk atu hasa’e ita nia obrigadu, no agradesimentu ba di’ak ne’ebé mak Nai Maromak kontinua hasuli mai ita”, tenik primeiru Kardeal Timor Leste.
Kardeal Virgílio hatete, dalaruma husu tau sinal agradesimentu ba Maromak ne’e sukat ho saida? Di’ak Maromak nian kontinua suli mai nu’udar sarani, povu ida ne’ebé fiar iha Maromak oinsa mak bele kontinua haburas domin ida ne’e iha sarani hotu nia leet.
“Iha felisitasaun husi ema oin-oin fo Mai atan ha’u desde loron 27 agusto 2022 mai too loron hirak ne’e, Iha liafuan oin-oin balun dehan Santo Padre fo premiu ida ne’e ba Timor Leste laos de’it tanba ema ida katak ha’u de’it, maibé liu-liu rekoñese sakrifisiu povu ida ne’e nian, korajen sarani ida ne’e nian iha momentu hotu-hotu liu-liu iha momentu hirak ne’ebé difisil iha kreda povu no nasaun nafatin fiel ba Maromak Momentu ida afirma iha kreda universál identidade povu ne’ebé maiória Katólika iha rai ki’ik oan ida ne’e”.
Nia dehan, Husi Tasi-Tolu mak fatin ne’ebé mak bolu mos atu fo sasin kona-ba di’ak hotu maromak nian ne’ebé simu no kontinua simu, la haksolok tanba de’it rekoñesimentu ida no afirmasaun ida iha mundu maibé konvite ida oinsá papel povu no kreda Timor nian bele kontribui ba mundu.
“Ita nia istória iha Tinan rua nulu ne’e hatudu oinsa, ita aprende oinsa atu hadame malu ho ema hotu-hotu liu-liu ho hirak ne’ebé ita hanaran ita nia inimigu sira,” lia ikus husi Kardeal Timor Leste.
Entretantu misa agradesimentu ne’e simu tiha bensaun final husi Sua Eminência Virgílio Kardial do Carmo da Silva, SDB, primeiru Kardial Timor Leste, ne’e mos sae kareta ki’ik haleu uma adat Tasi-Tolu akompania husi Bispu Dioseze Maliana no administrador Dioseze Baukau nian hodi fo bensaun ba sarani hotu-hotu ne’ebé parstispa iha misa refere.
Jornalista: Rita Moniz
Editór : Agapito de Deus
