Lafaek News–Carlito Sarmento koko retira dependénsia husi inan-aman ho negósiu kiik ho fiar an luta atu kompleta nia estudu iha Universidade Nasionál Timor Lorosa’e (UNTL) liu husi fan sigaru.

Carlito orijenalidade husi aldeia Bubolita suku Makadiki postu administrativu, munisípiu Vikeke, oan husi José alves Fernandes no Lourença da Costa Soares (Uatulari), hala’o hela estudu iha Fakuldade Edukasaun no Humanidade iha departamentu Mate-mátika, hakarak sustenta nia estudu ne’e ho nia kosar-ben rasik, tanba haree ba kondisaun inan-aman laiha rendimentu no moris depende liubá agrikultura. 

Haree ba kondisaun moris inan-aman iha foho, Carlito deside fan sigaru liu husi mekanizmu la’o ain haleu kapital Dili hodi buka fatin ne’ebé movimentu ho ema hodi fan sigaru LA ho Marllboro, ho prinsípiu rasik katak labele mo’e buka osan, labele tauk loron manas ho malirin, maibé labele tane liman no labele na’ok, buat hotu tenke liu husi dalan hisik kosar-ben.

Carlito jere tempu halo balansu hanesan, bainhira ba eskola dadeer, maibé lokraik tenke fan sigaru, se bainhira rama eskola lokraik iha dader tuku 7 too tuku 13 tenke fan sigaru ho pulsa hodi hetan osan sustenta eskola inklui nesesidade loro-loron iha Dili, tanba Dili nia kostume han ho hemu no buat hotu tenke osan. 

Osan jurus (funan)ne’ebé nia hetan husi sigaru ho pulsa utiliza selu mikrolete Ba Mai inklui sosa fos ho mina ne’ebé folin karun ba bei-beik, obriga tenke buka osan, tanba sidade Dili iha lala’ok mak tenke badinas ho kakutak tenke la’o hafoin bele hetan osan, se tuur hein de’it osan sentavus ida nunka mosu ka monu husi abu-abu leten.

 Carlito haktuir fan sigaru tanba distánsia entre nia ho aman-inan dook, no moris familia depende de’it ba agrikultura, maibé iha Uatulari aihan loro-loron nunka falta, maibé osan susar atu hetan, maibé sei hakiak animal hanesan karau, bibi, fahi ho manu, maibé sorte di’ak mak ema seluk bele sosa, tanba iha Uatulari populasaun hotu iha animal hanesan, susar duni atu hetan osan.

Iha Universidade Nasional Timor Lorosa’e kada fulan selu propinas 5.00 no kada semester  $30.00 dolar, maibe diferente ho nia maun dahuluk eskola iha Universidade da Paz (UNPAZ) foti Ekonomia ne’ebé selu kada semester $100 ba leten, pasiénsia Carlito deside fan sigaru tanba sira nain rua maun alin hala’o estudu iha universidade la hanesan no selu mos la hanesan.

Ha’u fan sigaru iha kampus, iha dalan no iha uma, tanba hela iha Dili dook husi inan aman, ho osan ne’ebé hetan husi sigaru ho pulsa ne’ebé ha’u fan hodi sustenta ha’u-nia nesesidade loro-loron hanesan selu bemo ba eskola, hola bee ho hahán ba han iha kampus hodi halo traballu, sigaru ne’ebé ha’u fan ne’e atu belehakman papa ho mama iha foho, tanba ami moris depende ba natar ho animal ne’ebé apa ho ama hakiak iha foho, bainhira  fan animal sira haruka osan mai sedu diak, karik sira haruka osan husi foho mai tarde, husi sigaru ne’ebe ha’u fan bele ajuda ha’u,’ katak estudante ne’e ba lafaek news iha sidade Dili,’sábadu (25/06/2022).

Carlito sigaru black, LA ho Marlboro, sosa Black slop ida $16.50,fan fali masu ida $2.00 hetan funan $3.50, LA slop ida $16.50 fan fali masu ida $2.00 hetan funan $3.50, no Marllboro karun slop ida $18.00,  fan Fmasu ida $2.00, hetan funan 2.00, no pulsa Telemor,Telekomsel sosa $10.00 dolar fan hetan funan $1.075 (dolar ida sentavus hitu nulu-resin lima), ho folin hirak ne’e fan iha areador ne’ebé Carlito la’o no tur ba, tuir oras no tempu ne’ebé livre husi tempu estudu.

Carlito esplika, maneira atu ema sosa lalais sigaru ho pulsa iha dalan importante tenke iha komportamentu di’ak liu-liu halo belu di’akn ho ema hotu, oin hamnasa atu nunee bele hetan osan lalais iha tempu ne’ebe livre husi estudu iha kampus, tanba tempu osan mean.

Ha’u hanesan oan ikun husi maun nain rua, maun nain rua mos eskola hotu, maun primeiru eskola iha UNPAZ no maun ida ami-rua tutuir malu ne’e eskola hotu iha UNTL, agora nia semester lima, ha’u mak semester 1 atu ba 2, entaun bainhira ami nain tolu husu osan dala ida ba papa ho mama, sira nain rua atu foti osan lalais iha ne’ebé hodi haruk mai ami nain tolu, entaun pasiénsia ha’u tenke buka dalan hodi hetan osan,’’katak Carlito.

Buka osan ne’e fasil, importante labele mo’e no labele hatudu an hanesan ema riku nia oan, istilu moris labele hanesan ema iha, maibé tenke katak mai husi kiak nia oan.

Ha’u nia mensajen ba hau-nia estudante maluk sira, ba mos sira foinsa’e hotu katak, labele moe hala’o atividade extra hanesan fan sigaru ho pulsa i ho saida de’it mak fan ba hetan osan hodi sustenta ba nesesidade loro-loron hanesan vida estudante, labele moe ho saida mak ita iha halo no lao tuir dala loos, labele bosok, labele han matak ema nia kosar-ben, tenke responsabilidade hodi hatoman an, hanesan ema edukante,’’ hakotu Carlito

Estajiadu : Felipe Soares

Editor        : Agapito de Deus