Lafaek News–Prezidente Repúblika (PR), Francisco Guterres Lú Olo, kuarta (18/05/2022), promulga ona dekretu Parlamentu Nasionál Lei númeru 62/V-alterasaun dahuluk ba Lei númeru 1/2022, 3 janeiru kona ba Orsamentu Jerál Estadu ba 2022 no kriasaun Fundu Kombatentens Libertasaun Nasionál.
Orsamentu Jerál Estadu Retifikativu ba tinan-2022 fahe tuir klasifikasaun ekonómika hanesan US $ 250.537.130 ba Saláriu no vensimentu $ 467.077.382 ba bens e servisu, US $1.950.982.687 ba transferénsia públika, $ 41.914.097 ba kapitál menor no US $390.177.399, kapitál dezenvolvimentu.
Xefi estadu ne’e hatete, OJE 2022 aprovadu ho Lei númeru/2022, 3 janeiru, maibé haree ba situasaun ekonómika internasionál no aumentu substansiál tasa inflasaun nian, sai nesesáriu ba estadu foti medidas hamenus impaktu ekonómiku hodi antisipa liuhusi dotasaun orsamental atu finansia sasukat sira.
Reseitas konsolidadas husi Setór Públiku Administrativu hahú sae ba US $ 3,100, 688,695. Despeza orgaun servisus no Administrasaun Sentral sae ba US $3,100,688,695.
Xefe estadu ne’e hatete, Bazeia Lei ne’e, durante tinan-2022, Governu autorizadu bele foti transferénsia husi Fundu Petrolíferu to’o montante US $ 2.552.598.015.
Entretantu tuir Lú Olo katak, harii Fundu ba Kombatentes Libertasaun Nasionál ho finalidade finansia programa apoiu ba Kombatentes Libertasaun Nasionál iha área sosial, edukasaun, saúde, empregu, asesu ba kréditu no atividade ne’ebé manán rendimentu, lei orsamentu Jerál Estadu Retifikativu ba tinan-2022 aprova iha Parlamentu Nasionál iha 11 maiu 2022.
Jornalista : Rita Moniz
Editór : Agapito de Deus
