Lafaek news-Prezidente repúblika eleitu, José Manuel Ramos Horta sei mobiliza fundu no husu apoiu ba fundasaun riku bo’ot sira iha mundu inklui mós governu Timor-Leste, atu kria bairu estudantíl iha Dili hodi bele fasilita.
Ha’u sei husu ba governu atu kria bairo estudantíl, ezemplu iha terenu ruma iha Bekora ne’ebá, iha Tasi Tolu ne’ebá, ita tenke halo fatin estratejiku rua ka tolu atu nune’e oan sira mai hosi foho, osan laiha, sira bele hela iha bairo sira ne’e,” dehan Laureadu Nobel da Paz José Manuel Ramos Horta ba jornalista Lafaek news iha nia rezidensia Farol, Dili, foin lalais ne’e.
Uma sira ne’e hanesan dormitoriu ida iha ne’ebé estudante nain tolu ka haat masimu bele hela hamutuk, no sira tenke selu maibé selu ho osan minimu, ezemplu kada fulan selu dolar sanolu, en vezde selu dolar limanolu, atu nune’e sira bele poupa osan.
Horta fundamenta, ema ne’ebé atu kontrola bairu ne’e mak kongregasaun Madre sira no sei la fó ba setór privadu ka kompañia ruma, tanba madre sira badinas no sira la gasta osan arbiru no iha hijene ba fatin sira ne’e katak iha ambiente ida sempre moos.
Iha fatin bairo estudantíl ne’e tenke iha doutór sira ka iha klínika ida no enfermeiru atu haree no tau matan ba joven sira, joven sira ne’e hela iha bairo ne’e tenke hetan check up, karik iha moras ruma halo kedan tratamentu labele iha joven ruma ne’ebé iha moras.
La’os prezidente nia mandatu maibé, hau sei lidera ida ne’e politikamente no moralmente hodi mobiliza apoiu no governu sei tau osan. Hau sei ko’alia ho Bill Gates fundation sira no fundasaun riku boot sira iha mundu hodi ajuda ita,” hakotu nia.
Jornalista: Felisberto Fernandes
Editór : Agapito de Deus
