Lafaek News–Kandidatu Prezidente Repúblika númeru sorteiu 1, Premiadu Nobel da Paz, José Ramos Horta, kuarta (05/04/2022), hala’o dor to dor ba negosiante merkadu Manleuana hodi observa kondisaun infraestrutura ho saneamentu ne’ebé la di’ak hodi hadia iha futuru.
Ohin ami halo dor to dor uituan, ha’u babain mai merkadu ne’e vizita sosa ema nia sasán, ohin ha’u haree sasán balun tau iha fatin no balun la tau iha fatin, más iha tinan hirak mai tenke halo merkadu ne’ebé kualidade di’ak ho saneamentu,’’ kandidatu prezidente repúblika hatoo asuntu ne’e iha merkadu Manleuana, kuarta (05/04/22).
Horta dehan, merkadu Manleuana ho nia kapasidade luan no atividade fan ho sosa la’o loro-loron, tanba ne’e presiza saneamentu ida kualidade kontrolu husi Ministériu Saúde atu nune’e evita moras oi-oin husi negosiante inklui klientes sira ne’ebé loro-loron ba sosa necesidades iha merkadu.
Primeiru tenke haree merkadu ne’ebé iha kondisaun saúde di’ak, segundu tenke iha kondisaun seguransa no utilizasaun eletrisidade tenke ho kuidadu, tanba foin da-daun ne’e kuitadu ema kubuk ida lakon sira nia sasán, ha’u lahetene governu halo saida, presiza halo rekompensaun ruma tanba sira lakon sasan barak, ha’u mos mai vizita iha momentu ne’ebá,’’ Horta sublina.
Iha sorin seluk, kandidatu ne’e mós ko’alia kona-ba kondisaun merkadu iha territoriu nasional laiha seguransa, ezemplu konkreta iha postu administrativu Maubisse povu fan produtu iha de’it luron se udan ho anin molok hetan dolar ida ka rua, tanba ne’e tenke buka fatin ne’ebé dignidade.
Ha’u promete klaru sei hamutuk ho governu ho parlamentu oinsá fo solusaun ba merkadu hotu iha territoriu nasional, maibé ha’u mos sei buka governu husi rai liur atu servisu hamutuk ho ita hodi hadia merkadu iha Timor Leste,’’ Horta promete.
observasaun lafaek news nota iha vizita kandidatu prezidente repúblika periodu 2022-2027, José Ramos Horta, hetan antusiazmu husi negosiante merkadu Manleuana kontente hodi simu vizita dor to dor ne’e, no hetan observasaun husi obserdadores nasional no internasional, CNE ho STAE inklui seguransa msimu husi PNTL munisípiu Dili, husi merkadu Manleuana tuir ajenda kandidatu nú-1 sei vizita veteranu Enernesto Fernandes Dudu no sei kontinua dor to dor iha tuku 12.00 OTL ba suku Tibar postu administrativu Bazartete munisípiu Likisá.
Jornalista : Agapito de Deus
Editor : Floriano Soares
