Lafaek News–Portavoz kandidatu prezidente repúblika 2022-2027, José Ramos Horta, atua Prezidente CDN partidu CNRT, Díonisio Babo Soares, iha konferénsia imprensa hateten nia parte rejeita total rumoris (lia-falsu) ne’eb espaila iha públiku katak lider karizmátiku Kay Rala Xanana Gusmão dada an ona husi Ramos Horta tanba moras.
Primeiru ekipa portavoz rejeita notisias ne’ebé fo sai katak maun boot Kay Rala Xanana Gusmão moras hela no la apoiu ona kandidatu José Ramos Horta nia kandidatura prezidénsia iha ronde daruak, ami konsidera ne’e lia-fuan falsa no hanesan lohi hodi lohi povu no publiku, sira hanoin kala ita nia populasaun sira sei kiak informasaun hanesan tinan 30 ba kotuk,’’ dehan Díonisio Babo Soares iha konferénsia imprensa ba jornalista sira iha sede kandidatu Ramos Horta, kuarta (06/04/22).
Portavoz asuntu polítika KanPres nú-1 ne’e konsidera populasaun Timor ohin loron matenek tebes ho la sériu ona atu rona lia-fuan falsu oi-oin hodi influénsia ema nia hanoin atu hili sala kandidatu iha loron 19 Abril, ekipa portavoz kandidatu númeru 1 fiar katak povu hotu sei hili sira nia prezidente tuir ema ida-idak nia konsiénsia, direitu no sekretu.
Ha’u hakerek ko’alia iha komunikadu imprensa ne’e katak, maun boot Xanana Gusmão laiha moras ruma, no agora hamutuk hela ho partidu siran seluk ho aliadus hotu kontinua fo apoiu no kondisional ba kandidatu José Ramos Horta, agora da-daun sira ida-idak halo hela servisu iha kampaña ronde daruak atu prepara ba votasaun loron 19 Abril ne’e, ita tenke reafirma katak Ramos Horta sei manan iha segundu ronde,’’ Babo akresenta.
Prezidente CDN ne’e no portavoz asuntu polítika kandidatu prezidente José Ramos Horta husu ba públiku tomak katak oras ne’e da-daun lider karizmátiku Kay Rala Xanana Gusmão atual prezidente partidu CNRT nia kondisaun saude saudavel hela ho grasa maromak nian nia (XG) kontinua servisu apoiu Ramos Horta ba eleisaun segunda ronde iha 19 de Abril 2022.
Portavoz ne’e diskorda ho adversáriu polítika sira uza patrimonia estadu li-liu politiza projetu hirak hanesan uma kbiit laek, ekipamentu ne’ebé fo ba suku sira, uza hodi halo politiza iha kampaña ida ne’e, maibé husu publiku atu hatene katak uma kbiit laek ta,a iha programa habitasaun ne’ebé kontempla ona iha Planu Estratéjiku Dezenvolvimentu Nasionál komesa kedan governu CNRT ho nia alidus sira ukun.
Iha fatin hanesan, Portavoz Asuntu Jurídiku kandidatu númeru-1 José Ramos Horta, Avelino Coelho Salar Kossi FF, hateten rumoris hirak ne’ebé adversariu lansa iha palku polítika hanesan lolos hamaus revixadu ba labarik kiik oan sira, kaer hela governu maibé ba promete tan kuandu manan governu sei fahe osan, se osan iha karik tanba saida mak la halo dezenvolvimentu liga ho dezastre naturais 4 de Abril 2021 too agora seidauk rekupera.
Ita akompania rumoris sira ne’ebé kandidatu Lú Olo halo hanesan ita lori revixadu bosok labarik kiik oan sira, sira mak kaer hela governu depois ba promete tan atu hasa’e osan ferik katuas sira no halo dezenvolvimentu, ne’e ita halo polítika ida la koerente no laiha balansu hodi influensia povu sira hodi hili buat ne’ebé la loos no la justu, povu tenke matenek hodi tetu atu iha loron 19 Abril ne’e hili Ramos Horta hodi hadia rai ne’e ba oin,’’ katak Avelino Coelho.
Husu mos ba militantes no simpatizante tomak husi partidu CNRT, PST, PUDD, PDRT, PD no Frente Mudanca ho povu tomak iha territoriu nasional atu matan moris neon nain labele monu ba grupu balun tenta lohi povu, lohi veteraus no ferik katuas sira katak governu sei hasa’e osan ferik katuas no subisdiu no halo uma ba kbiit laek sira, programa hirak ne’e kontempla ona planu estratéjiku dezevolvimentu nasional governu se de’it mak ukun tenke la’o tuir natureza PEDN too mandatu remata.
Jornalista : Agapito de Deus
Editor : Floriano Soares
