Quarta, 16/03/2022
Hosi: Domingos Maia.
Maluk neon-na’in sira:
Buka atu kompriende mós natureza ema nian.
Katuas ida nebé nanál dabak daudaun ona la artikula didi’ak lia-fuan sira, dala barak, temi sal-sala de’it.
Foinsa’e sira nebé agora sai ideál, tenke hatudu-an hahalok nu’udar neutralizadór.
Se foinsa’e sira tutuir fali katuas sira, kasian tebes, loron ruma, sira-nia nanál bele sai strouk sedu tiha karik?
Basá sira rasik ho laran kman, kritika aat lós katuas sira sai korutór hanesan ne’e, hanesan nebá …
Maibé sira rasik mak temi fali lia-fuan nebé soran, sukuista, rasista, diskriminativu, hatún sira-nia dignidade; dala barak sira foti-an matenek, esperiente liu fali katuas no ferik sira.
See mak gosta atu apoia atitude lideransa nasionál hanesan ne’e?
Ne’e sira nebé mak soi toman hanesan sira.
Oinsá mak atu sai ukun-na’in modelu futuru unifikadór ba povu TL tomak?
Modelu ida nebé ideál duni ba TL atu haktuir lider foinsa’e sira ba futuru Nasaun RDTL nian. Ita bele haree daudaun housi naran figura sira ne’e:
— LAT, maske tuan-baluk ona, maibé ho nia lia-fuan no hatudu lala’ok unifikadór;
— R. Maria de Araújo abilitadu teknokrata;
— G. Saldanha lider;
— Assanami Sabino;
— Virgílio Guterres;
— na’i Duarte no bin inalou M. Pires foin hatudu-an;
— no lider Timor oan sira barak mak seidauk soi loloos biban atu hatudu-an ba públiku.
Basá sira nebé temi tiha ona naran, nst, barak ka uitoan, hatudu-sai tiha ona sira-nia kapasidade lideransa ho nanál-mamar no bele artikula lia-fuan sira nebé hamamar ema wa’in nia fuan no sai mahon atu halibur mós ema nobun housi otas no dalas hotu.
Ita hatene mós katak obriga otas-tuan atu muda lalais fali sira-nia karáter nebé mahar-
to’os fatuk tiha ona, la’ós lori servisu-kma’an ida.
Tan ne’e mak ema balun hakarak uza dalan revolusaun – mentál mak prosesu ida atu kuda lalais liu buat-foun ba mentalidade foun sira; no foinsa’e sira nebé sai nu’udar rai-metan bokur hodi haburas lalais lideransa tunas-foun atu troka hulan fali ai-liman naha-todan ukun Nasaun RDTL nian housi otas-tuan sira.
Fenomena revolusaun ho dame ne’e mak akontese daudaun ona ho foinsa’e sira nebé brani rame- rame suporta-malu kandidata-an ba ELPres iha 19/03/2022.
Tuir natureza,
mentalidade ida nebé tuan ona ho karáter nebé to’os tiha ona, mak tenke dudu ka selok neineik, maibé ho maneira forte atu ba hatuur-an ka hamriik tiha iha fatin kotuk hodi sai nafatin fatuk-ri’in kahakat ka marku-ri’in referénsia nebé orienta lala’ok no hahalok polítiku housi tubun-foun sira.
Se ida ne’e duni mak sai prinsípiu ideál ida atu lider foinsa’e sira halibur-malu hodi buka dalan hari’i hamutuk?
Mai ita aprende.
