Lafaek News–Kandidatu Prezidente Repúblika ho númeru sorteiu 8, Tenente Jeneral Lere Anan Timur, afirma hamriik iha palku nu’udar polítika la’os militar, prontu hasoru polítika nain sira ne’eb halo polítika durante tinan 20 nia laran.
Agora Ha’u hamrik iha ne’e nu’udar politika no lider la’os militar, ha’u pasa reforma iha loron 28/2022, atu sai polítiku foin fulan ida resin, maibé ha’u prontu atu hasoru politiku nain sira ne’ebé hala’o politiku tinan 20 resin,” Lere hato’o asuntu ne’e iha munisípiu Ainaru, sesta (11/03/2022).
Lere argumenta, razaun kandidata aan ba Prezidente Repúblika ne’e, domin mai husi konsellu Veteranus, rezisténsia sira no mos mai husi offisiais defeza Timor-Leste dehan tempu to’o ona atu kandidata aan ba Prezidente Repúblika.
Ha’u sai polítiku fulan ida, maibé ha’u bele, tanba domin mai husi povu Timor-Leste, domin mai husi Inan aman ain tanan, bibi atan no mos domin mai povu ai-leba sira, tanba ne’e mak ha’u barani avansa kandidata an,” Jeneral Lere afirma.
Jeneral Lere esplika, nia la estuda polítika, maibé bele halo polítika tanba sira ne’ebé estuda polítika nunka implementa (Halo), maibé Lere implementa uluk tiha mak estuda polítika.
Lere informa, la’o husi Lorosa’e to’o loro monu ohin iha Ainaru hodi simu lovu nia domin tanba hotu hotu hatene katak nia (Lere), atu kandidatu ba Prezidente Repúblika maibé la’os atu fahe osan ba ema ida-idak.
Liu iha fatin-fatin ha’u dehan, ha’u la’os kualker sidadaun maibé ha’u Gerileriu ida funu nain tinan 24 tanba ha’u membru Comite sentral FRETILIN segundu jerasaun ho ida nee hau nafatin husu imi nia domin mai hau núnee hau sai prezidente fo fali imi nia domin,” Lere Reafirma.
Antes ne’e Sentru Nasionál Eleisaun (CNE), fo sai ona katak, labarik sira labele partisipa iha kampaña maibé Observasaun Jornalista Lafaek News nian durante Kandidatu Prezidente Jeneral Lere Anan Timur hala’o kampaña iha munisipiu Ainaru, partisipasaun labarik (minoridade), nian kuaze porsentu 15.
Jornalista :Orlando Magno
Editor : Agapito de Deus
