Lafaek News (Aileu)–Estrada públiku diresaun kruzamentu Beahu’u to’o suku Faturilau postu-administrativu Lequidoe, munisípiu Aileu kondisaun grave hodi difikulta movimentu transporte públiku ano afeta no komunidade sira labele lori sira nia produtu ba asesu iha merkadu.
Xefe suku Manukasa, postu Lequidoe, Juliana Imaculada hateten, tinan-tinan povu sempre enfrenta problema enfraestrutura estrada públiku ne’ebé difikulta ba transporte públiku sira susar atu komunidade sira lori sira nia sasan ba asesu iha merkadu.
“Ita hatene katak estrada ne’ebé di’ak para de’it iha kruzamentu Buahu’u, mai husi kruzamentu Buahu’u nia mai to’o iha kruzamentu Aileu ba suku ne’ebé ikus Faturilau halo baliza ho Manatutu nomós estrada iha edifísiu foun administrasaun postu Lequidoe nian hetan sentimu hira de’it kotu ona, se wainhira natureza ohin no aban makaas,” dehan xefi suku Manukasa, postu Lequidoe munisípiu Aileu, kuarta (02/03/2022).
Enkuantu iha suku Manukasa kompostu husi aldeia rua (2) no totál familia hamutuk 180 no populasaun hamutuk 747, maioria depende vida agrikultor hodi sustenta nesesidade uma-laran no haruka oan sira ba eskola, maibé susar liután estrada nia kondisaun la di’ak atu fasilia povu kiik lori nia produtu ba merkadu nasional hodi buka osan ba moris loro-loron.
Jornalista : Juvita dos Santos
Editor : Agapito de Deus
