Lafaek News – Kandidata Prezidente Repúblika periodu 2022-2027, Isabel da Costa Ferreira hateten, nia mai ho vizaun ne’ebé simples maibé ambisioza, hametin independénsia hodi dezenvolve fiar, familia no Patria.
Ha’u ho sorteiu númeru 1, mai ho vizaun ne’ebé simples maibé ambisioza, mai hametin independénsia hodi dezenvolve ita nia fiar ho ita nia familia no ita nia patria,” dehan Kandidata Isabel da Costa Ferreira ba Lafaek News iha Casa Sidadania Kolmera Dili, sesta (25/02/2022).
Nia informa, iha kauza sosial boot lima ne’ebé konsentra iha kandidatura nia atensaun ba tinan lima mak hanesan, ba familia komunidade no nasaun, ba koezaun uniaun no dezenvolvimentu sustentavel, ba igualdade inkluzaun no integrasaun, ba konsiénsia partisipasaun no ativizmu demokrátiku, ba produtividade inovasaun no emprendorizmu.
https://lafaeknews.tl/Isabel-Hetan-Apoiu-Husi-PLP-ba-ELPR/
Enkuantu iha proximiadade walu ba sidadaun sira mak hanesan, besik ba familia, besik ba komunidade, besik liu ba ema ne’ebé mukit, besik liu ba ema ne’ebé kbi’it laek, besik liu ba ema ne’ebé desfavoresidu, besik liu ba labarik no joven, besik ba grupu no organizasaun sosiedade sivil, besik ba ema ne’ebé lian laiha.
Ita hakarak dezenvolve dever tolu sidadania ne’ebé konsiente, ativa no partisipa liutan, dever boa governasaun, dever poupansa jelo no konservasaun, dever responsabilidade no transparénsia, mai ita hamutuk iha mehi ida de’it ba Paz Estabilidade no Moris di’ak, ita hamutuk iha domin no asaun ita bele,” dehan Nia.
Neduni hakarak sai prezidente ida ativu no besik liu ba povu hodi buka solusaun no problema sira ne’ebé povu no nasaun enfrenta.
Ha’u hakarak sai prezidente ida mais ativu i proximu besik povu, atu hamutuk ho familia no povu atu buka solusaun ba problema ne’ebé sira ne’ebé nasaun enfrenta, atu nune’e ita hotu bele sente katak Timor ita hotu nian, ita labele pasivu maibé tenke ativu, labele depende de’it ba lider no estadu, maibé sidadaun tenke sai sidadaun ne’ebé ativu hanesan uluk ita luta ba ukun rasik an,” deklara Kandidata Isabel Ferreira.
Labele tau povu ida iha kotuk, nune’e povu rasik tenke sai sujeitu ba prosesu ida ne’e.
Ha’u nia kandidatura ida ne’e mai ho hanoin atu halo revolusi mental, muda ita nia atitude, ita labele sai sidadaun ne’ebé pasivu ou sidadaun ne’ebé instan, hakarak buat hotu ohin lakohi atu halo sakrefisiu, lakohi halao esforsu atu hetan buat ne’ebé ita hakarak,” deklara Isabel Ferreira.
Keta haluha loron 19 fulan marsu tinan 2022, hotu-hotu ba vota ho konsiénsia, husu ba maromak atu haraik espiritu santu atu eskolla ba prezidente ne’ebé hili tuir de’it maromak nia hakarak atu bele hamutuk dezenvolve tuir ema hotu nia mehi no tuir maromak nia hakarak.
Keta haluha vota ba númeru 1,” hakotu Isabel Ferreira.
Jornalista : Juvita dos Santos
Editor : Agapito de Deus
