Lafaek News–Ekipa Tane Timor-Leste (TTL) ho domin apoiu aihan ba familia kbiit laek Domingos dos Santos ne’ebé hamahan an iha baraka simples ida iha laletek suku kamea Bekora ho tinan barak hasoru dezafius oi-oins iha aspeitu nesesidade bázikas loro-loron.
Inisiativa ekipa Tane Timor-Leste fó apoiu ne’e, tanba asesu informasaun husi media online lafaek News ho titulu notisia Hamos Toos Viziñu Loron Ida Hetan Foos Lata Rua Sustenta Moris, iha semana hirak liu ba, nune’e ekipa buka hatene no kontaktu kedan hodi lori aihan uitoan ba apoiu.
“Ami ekipa Tane Timor-Leste ho inisiativa rasik husi ami nia grupu halo kontribuisaun mak sosa foos, supermie ho nesesidade seluk tan ho natoon lori ba tulun hanesan fos mina, masin masako no seluk tan, ba familia kbiit laek ne’ebé Kamea iha Bekora tanba sentimentu umanidade no paixao”, dehan Reprezentante Ekipa Pedro Alves ba Lafaek News iha barraka kbiit laek Domingos dos Santos, iha laletek Aibubur-Laran Kamea, tersa (22/02/22).
Pedro fundamenta,, ezisténsia ekipa TTL besik ona tinan ida resin eziste ho vizaun no misaun rasik, oinsa atu promove turizmu iha Timor-Leste seluk mak buka hatene no identifika problema sosial sira ne’ebé komunidade sira enfrenta hanesan situasaun ne’ebé ohin ekipa rasik to’o iha terenu apoiu nune’e mós halo pakote dokumentáriu atu fó hanoin ba governante sira bele konsidera netik preokupasaun moris populasaun kiik iha baze.
Ami apoiu la’os ho intensaun buat seluk maibe ho prinsipiu ida, hanesan Santa Terezinha Kalkuta dehan, halo buat ne’ebé simples maibe ho domin, ne’e valór boot liu, tanba hanesan ema unidade ida iha rai ida ne’e.
Enterantu ekipa tane Timor-Leste kompostu husi fetó no mane besik ema nain 10 resin, ne’e grupu ne’e eziste iha loron 26 fulan Agostu tinan 2020 iha sentru Mangrove Hera.https://lafaeknews.tl/Hamos-Toos-Vizinu-Loron-Ida-Hetan-Foos-Lata-Rua-Sustenta-Moris/
Sorin seluk, kbiit laek Domingos dos Santos, sente haksolok ho prezensa ekipa Tane Timor Leste ne’ebé hakmaan ona nia husi situasaun mukit ida ne’ebé hasoru durante tinan lubun iha laletek Aibubur-Laran Kamea Dili, ne’ebé dook husi bee mos, no la sente naroman husi eletrisidade, maske hateke tuun sidade Dili nabilan ho kores oi-oin, maibé iha laletek moris iha nakukun no dook husi nesesidade báziku.
Agradese ba média Lafaek News ne’ebé lori ha’u nia lian ba fanun Timor oan hotu hodi konese ha’u nia moris ne’e, maromak sei tulun ita boot sira, ha’u agrdese boot tebes ba oan sira husi ekipa Tane Timor Leste, ho laran di’ak mai ajuda ona, ha’u husu na’i maromak hodi tulun ita boot sira nia servisu ho matenek no aten brani hodi kontinua ajuda mós maluk seluk ne’ebé moris susar terus iha fatin seluk,’’ katak kbiit laek Domingos.
Jornalista : Azelio da Cruz
Editor : Agapito de Deus
